ЭРТАДАН УЙИНГИЗ ИСИЙДИ

Пойтахтимизда 10 ноябрдан бошлаб ижтимоий соҳа объектларида, 12 ноябрдан тураржой биноларида мунтазам иситишга киришилади. Бу ҳақда Тошкент шаҳар ҳокимлигининг расмий сайти хабар тарқатди.

50 000 сўмлик муомалага чиқади

22 августдан бошлаб Ўзбекистон Республикаси Марказий банки қиймати 50 000 сўм бўлган банкнот кўринишидаги янги пул белгиларини муомалага чиєаради.

Аҳолимиз сони 32,43 миллион

2017 йилнинг 1 июль ҳолатига кўра, юртимизнинг доимий аҳолиси сони 32,43 миллион нафарга етди. Бу эса йил бошига нисбатан 224,5 мингга ёки 0,7 фоизга кўпдир.

Ўзбекистон — дунё ўнталигида

Ўзбекистон дунёнинг иқтисоди энг тез ривожланаётган мамлакатлар ўнлигига киритилди. Бу ҳақида Жаҳон банкининг «Глобал иқтисодий ислоҳотлар» ҳисоботи асосида Жаҳон иқтисодий форумида маълум қилинди.

Жаҳон банки прогнозларига кўра, Ўзбекистоннинг ЯИМ ўсиш прогнози 2017 йилда 7,6 фоизни ташкил этади. Бу 8,3 фоизли ўсишни қайд этган Эфиопиядан кейинги энг яхши кўрсаткич — иккинчи ўриндир.

Халқ таълими вазирлиги томонидан «Энг яхши чет тили фани ўқитувчиси» кўрик-танлови ўтказилмоқда.

Унда умумтаълим мактабларининг инглиз тили фани ўқитувчилари қатнашиши мумкин. Танлов уч босқичда ўтказилади. Ғолиблар 2018 йилда давлат бюджети маблағлари ҳисобидан ривожланган хориж давлатидаги нуфузли олий ўқув юртида малака ошириш имкониятига эга бўладилар.

Уч кун дам олиш бўлади

Ўзбекистон Республикаси Президентининг 2017 йил 2 майдаги қарорига кўра, 9 май – Хотира ва қадрлаш кунининг халқимиз ҳаётидаги муҳим ижтимоий-маънавий ўрни ва аҳамиятини эътиборга олиб ҳамда аҳолининг дам олиши учун қулай шарт-шароитлар яратиш мақсадида 2017 йил 6 май шанба дам олиш куни 2017 йил 8 май душанба кунига кўчирилди ва иш куни деб, 8 май душанба куни эса дам олиш куни, деб эълон қилинди.

Адиблар хиёбони барпо этилади

Алишер Навоий номидаги Ўзбекистон Миллий боғи ҳудудида Адиблар хиёбони барпо этилади. Президент Шавкат Мирзиёев 2017 йил 18 апрель куни шу ҳақдаги ҳужжатни имзолади.

Уруш қатнашчиларига пул мукофоти

Мамлакатимизда 9 май – Хотира ва Қадрлаш куни, 1941-1945 йиллардаги Иккинчи жаҳон урушида фашизм устидан қозонилган ғалабанинг 72 йиллиги мунособати билан уруш қатнашчилари ва ногиронларига 2 000 000 (икки миллион) сўм миқдорида бир марталик пул мукофоти берилади.

10000 сўмлик муомалага чиқарилади

2017 йилнинг 10 мартидан бошлаб Ўзбекистон Республикаси Марказий банки қиймати 10000 сўм бўлган банкнот кўринишидаги янги пул бирлигини муомалага чиқаради.

Маҳаллаларда кутубхона ташкил этилади

Бу ҳақда Халқ билан мулоқот ва инсон манфаатлари йилида «Маҳалла» хайрия жамоат фонди олдида турган вазифаларга бағишлаб ўтказилган матбуот анжуманида маълум қилинди.

2016 йил мамлакатимизда пластик карталар орқали амалга оширилган тўловларнинг энг сермаҳсул даври бўлди.

Ягона умумреспублика процессинг маркази таҳлилига кўра, пластик карталар бўйича транзакцияларнинг умумий сони 1 миллиард 18 миллион донани ташкил қилган ва 2015 йилга нисбатан 81 фоизга ошган. Транзакцияларнинг умумий суммаси эса 53,3 триллион сўмни ташкил қилган ва 74 фоизга ошган (2015 йилда — 30,7 триллион сўм).

Тўртта фармацевтика саноат зонаси ташкил этилади

Мамлакатимизда тўртта фармацевтика саноат зонасини ташкил этиш таклиф қилинмоқда. Президентимизнинг шу ҳақдаги қарори лойиҳаси норматив-ҳуқуқий актлар муҳокамаси порталида эълон қилинди, дейилади gazeta.uz сайтида. Ҳужжатда Бойсун туманида «Бойсун-фарм», Бўстонлиқ туманида «Бўстонлиқ-фарм», Зомин туманида «Зомин-фарм» ва Сирдарё туманида «Сирдарё-фарм» фармацевтика саноат зоналари очилиши кўзда тутилган.

Сайлов куни автобус ва метро текин

4 декабрда мамлакатимизда ўтадиган муҳим сиёсий жараён — Ўзбекистон Президенти сайлови куни Тошкент шаҳридаги барча йўналишлар бўйича қатновчи автобуслар ҳамда метро пойтахт аҳолиси ва меҳмонларига бепул хизмат кўрсатади.

«1055» хизмати узлуксиз ишлайди

Тошкент шаҳар ҳокимлиги «1055» диспетчерлик хизмати аҳолининг қиш-қировли кунларда иссиқлик, табиий газ, электр таъминоти, кўп қаватли уйларнинг ертўлалари, кириш йўлаклари, чордоқлар, том устидаги барча муаммолар  ва хизмат кўрсатувчи ташкилотлар фаолияти билан боғлиқ  бошқа  масалалар бўйича мурожаатларни узлуксиз туну кун қабул қилиши ва бу муаммоларни тезкорлик билан  бартараф этишини маълум қилди.

Шунингдек, тўрт рақамли диспетчерлик хизматлари пойтахтнинг ҳар бир туманида ҳам ташкил этилди. Улар аҳолини қийнаётган барча муаммоларга зудлик билан ечим топиш устида иш олиб боради.

Ўқувчи ва талабаларга чегирмалар белгиланди

«Ўзбекистон темир йўллари» АЖ ўқувчи ва талабаларга белгиланган чегирмалар тўғрисида маълум қилди. Ўзбекистон Республикасининг ўрта махсус таълим тизими ва олий ўқув юртларида таҳсил олаётган ёшларни рағбатлантириш, ижтимоий қўллаб-қувватлаш мақсадида 2016 йил 1 — 5 декабрь кунлари эълон қилинган қўшимча таътил вақтида «Ўзбекистон темир йўллари» АЖ ўқувчи ва талабаларга Ўзбекистоннинг ички йўналишларида йўл чипталарни харид қилиш учун 50 фоизлик имтиёз белгилади.