Кўприк қулаб тушадими?

Катта юк машинаси 10 км узунликдаги кўприкдан ўтмоқда. Кўприк фақат 2300 тоннани ушлаб туриши мумкин, бу юк машинасининг аниқ оғирлиги. Юк машинаси кўприкнинг ярмидан кўпини босиб ўтади ва тўхтайди. Юк машинасига қуш қўнмоқда. Кўприк қулаб тушадими? Сабаб кўрсатинг.
 

Футбол ишқибозлари учун савол

Футболда «қуруқ барг» деган ибора бор, у қайси ҳолда ишлатилади?

Тил бойлигимизни аниқлаймиз?

Кўнгил … кетмоқ. Бирор нарса ейиш ёки ичишни ниҳоятда хоҳламоқ.

Кунлардан бир кун бир мўйсафид бозорга балиқ олиб келди. Шокиржон буни кўрди-ю, кўнгли … кетди (журналдан).

Учтадан биттаси

Шоҳ вазирига «Менга нок олма анор келтир» деб буюрибди. Зукко вазир битта мева келтирибди.

Диққат савол: вазир қандай мева келтирган?

Беморнинг «шериги»

Ҳиндистон тарихида бир пайтлар вафот этган эр билан бирга унинг аёлини ҳам гулханда ёқишгани ҳақида эшитгансиз. Қадимги Мисрда эса бирон киши касаллик туфайли вафот этса, у билан бирга яна бир кишини қатл қилишган. 
Диққат савол: вафот этган бемор билан бирга ким қатл қилинган? 

Қуроллар нега безатилган?

Император Юлий Цезар ўз қўшинларига қалқон ва қиличларини қимматбаҳо нарсалар билан безатиш­ни буюрган экан.
Диққат савол: Юлий Цезар нима сабабдан шундай қилган?

Она тимсоҳ

Тимсоҳлар асосан сувда яшаса ҳам тухум қўйиш учун қуруқликка чиқишади. Тухумларни ёриб чиққан тимсоҳчаларни сувда яшашга ўргатиш ҳам она тимсоҳнинг вазифаси саналади. 
Диққат савол: қуруқликдаги ҳали юришни билмайдиган тимсоҳларни она тимсоҳ қандай қилиб сувга олиб боради?

У нима дегани?

«Кўлик» сўзи ҳозирда фақат маълум ҳудудлардагина ишлатиладиган шевага хос сўз сифатида қаралади. Лекин қадимги ёзма ёдгорлик­лар – «Девону луғатит турк», «Қутадғу билиг» каби манбаларда «кўлик» умумтуркий сўз сифатида ишлатилган. 
Диққат савол: ҳозирда ҳам жонли тилимизда қўлланиб келаётган ушбу сўз нимани англатади? 

Қотил ким?

Шерлок Холмс хиёбонда сайр қилиб юриб бир аёлнинг жасадини кўриб қолди. У аёлнинг чўнтагидан телефон топиб олди ва аёлнинг эрига қўнғироқ қилиб: «Тезда етиб келинг, хотинингизни ўлдириб кетишибди», дейди. Аёлнинг эри етиб келиши билан Шерлок Холмс полицияга қотил айнан эрнинг ўзи эканлигини айтади. 
Диққат савол: Шерлок Холмс буни қандай билди?

У нимадир?

Махтумқули ва Дурди шоир айтишувида Махтумқули шундай ёзади:
– У нимадир, тупроқ каби суринмас?
У нимадир, одамларга кўринмас?
У нимадир, бирор тўнга ўранмас?
Шоир бўлсанг, шундан бизга хабар бер!
Диққат савол: ушбу мисраларга Дурди шоир қандай жавоб қилган?
 

Ғаввослар сири

Сув остига шўнғийдиган моҳир ва тажрибали ғаввослар ўзлари билан нина олиб юришган. Сув остида уни олиб юриш бироз ноқулайлик туғдирса ҳам ғаввослар ундан воз кечмаган. Чунки нина улар учун жуда муҳим аҳамиятга эга бўлган. 

Диққат савол: ғаввос нинадан нима мақсадда фойдаланган? 

Қандай қуш?

Бу қушлар фақат ўзларидан кичик жуссали жонзотларга ҳужум қила олади. Лекин уларнинг бир тепкиси от тепкисидан ҳам қаттиқроқ зарба экани аниқланган. 
Диққат савол: Бу қандай қуш? 

Фузулий шеъриятининг асоси нима?

«Фузулий шеъриятининг асосий мавзуси ҳам, ҳаракатлантирувчи кучи ҳам, бу шеърларни ичдан нурлантириб турган қувват манбаи ҳам, уларни жозибали ва севимли қилган ҳам – барча-барчаси ...... , – деб ёзади олим Эргаш Очилов. – Шоир учун у устоз, шогирд, дўст, маҳрам, ҳаёт мазмуни, яшаш шарти, инсонийликдан мақсад, хуллас у – ҳамма нарса!»

Қайси шаҳар?

Савол: Буюк маърифатпарвар олим Маҳмудхўжа Беҳбудий номи XX асрнинг биринчи чорагида қайси шаҳарга берилган?

Хат ташувчи жонзот

Хат ташувчи жонзотлар дейилганда хаёлимизга дарров каптарлар келади. Лекин бу қушлар тинч ҳудудлардагина парвоз қилишади. Даҳшатли тўфонлар гирдобидаги уруш ўчоғидан хат жўнатишда каптардан фойдаланиш яхши самара бермайди.