Олий Мажлис Қонунчилик палатасидаги Ўзбекистон Экологик партияси фракциясининг навбатдаги йиғилишида бир қатор қонун лойиҳалари биринчи ва иккинчи ўқишда муҳокама қилинди. Хусусан, «Суд-экспертлик фаолияти тўғрисида»ги қонун лойиҳаси фракция аъзолари томонидан биринчи ўқишда кўриб чиқилди.

Таъкидланганидек, қонун лойиҳасида нодавлат суд экспертиза ташкилотларининг ҳуқуқий мақомини белгилаш, уларга қўйиладиган талаблар, фаолиятини методик таъминлаш ва тартибга солиш механизмларини жорий этиш назарда тутилмоқда.

Шунингдек, суд-экспертлик фаолиятининг янада ишончлилигини ошириш мақсадида қонун лойиҳасида аккредитация ва валидация институтларини жорий этиш белгиланмоқда.

Қонун лойиҳасида суд-экспертлик муассасалари, суд экспертлари ҳамда улар фойдаланадиган услубиётлар реестрини юритиш, суд экспертларининг малакасини баҳолаш ва назорат қилиш тизимини такомиллаштириш, фаолиятда шаффофликни таъминлашга қаратилган нормалар белгиланаётгани фракция аъзолари томонидан маъқулланди.

Йиғилишда фракция аъзоси Наврўз Юсупов қонун лойиҳасининг аҳамиятига эътибор қаратиб, суд-экспертлик фаолиятининг ҳуқуқий асосларини такомиллаштириш соҳада холислик, шаффофлик ва ишончни мустаҳкамлашга, экспертиза хулосаларининг ишончлилигини янада оширишга хизмат қилишини алоҳида қайд этди.

Муҳокамаларга бой бўлган йиғилишда фракция аъзолари қонун лойиҳасини такомиллаштириш бўйича таклифлар билдириб, уни қўллаб-қувватладилар.