Олий Мажлис Қонунчилик палатаси Спикери бошчилигидаги делегация расмий ташриф билан Покистон Ислом Республикасида бўлди. Делегация таркибида бўлган депутатимиз ушбу ташрифнинг аҳамияти ҳақида ўз фикрларини билдирди.

Ўзбекистон билан Покистон ўртасидаги алоқалар кўплаб йўналишлар қатори парламентаризм соҳасида ҳам ривожланиб бормоқда. Айниқса, икки давлат парламентлари ўртасида тузилган дўстлик гуруҳлари фаолияти фаоллашмоқда.

Қонунчилик палатаси делегациясининг ушбу мамлакатга ташрифи ва ўтказилган учрашувлар, шубҳасиз, парламентлараро мулоқотни янги босқичга олиб чиқишда муҳим қадам бўлди.

Хусусан, икки мамлакат дўстлик гуруҳларининг йиғилишида инвестиция муҳитини яхшилаш, кичик бизнес ва тадбиркорликни қўллаб-қувватлаш, атроф-муҳитни муҳофаза қилиш, маданий-гуманитар, туризм, транспорт-коммуникация масалалари муҳокама қилинди.

Амалий ҳамкорликни ҳар томонлама мустаҳкамлашда парламентларнинг ролини кучайтириш, бу борада парламент делегациялари алмашинувини доимий йўлга қўйиш лозимлигига алоҳида эътибор қаратилди.

Ўзбекистон ва Покистон ўртасидаги ҳамкорлик нафақат икки давлат манфаатларига, балки бутун минтақанинг барқарорлиги, хавфсизлиги ва тараққиётига ҳам хизмат қилади.

Бахтиёр ПЎЛАТОВ,

Олий Мажлис Қонунчилик палатаси депутати,

ЎЭП фракцияси аъзоси