Куни кеча Олий Мажлис Қонунчилик палатасининг навбатдаги мажлисида мамлакатимиз ҳаётига оид бир қатор масалалар, муҳим қонун ҳужжатлари муҳокама қилинди.

Депутатлар томонидан турли фикрлар, ўринли эътирозлар ҳам билдирилди. Олий Мажлис Қонунчилик палатасидаги Ўзбекистон Экологик партияси фракцияси барча масалага партия дастурий мақсадлари, бугунги экологик вазият, атроф-муҳит ҳолатидан келиб чиққан ҳолда ўзининг қатъий позициясини билдирди. Аввало Экопартия фракцияси йиғилишида кун тартибидаги барча масала қизғин муҳокама қилинди. Турли таклифлар ўртага ташланди.

Қуйи палатанинг навбатдаги йиғилишида «Суднинг мустақиллиги ва судьялар дахлсизлигини таъминлаш чоралари янада кучайтирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун лойиҳаси, мувофиқликни баҳолаш органларининг масъулиятини янада ошириш ҳамда маҳсулотларни ўз ихтиёри билан чақириб олган тадбиркорларга енгиллик беришга қаратилган қонун лойиҳаси, иш вақтидан ташқари иш учун ҳақ тўлаш ва унинг давомийлигини соддалаштиришга қаратилган қонун лойиҳаси, тўлов тизими операторлари ва тўлов ташкилотлари фаолиятини такомиллаштиришга қаратилган қонун лойиҳаси каби муҳим қонун лойиҳалари муҳокама қилиниб, улар юзасидан қарорлар қабул қилинди.

Эндиликда суд биносида судга ҳурматсизлик қилганлик учун маъмурий жавобгарлик чоралари, шунингдек суд ишларини ҳал этишга аралашганлик учун жавобгарлик чораларини аниқлаштириш назарда тутилмоқда. Яъни, суд ишларини ҳал этишга аралашиш, муайян ишни ҳар томонлама, тўла ва холисона кўриб чиқишга тўсқинлик қилиш ёки ғайриқонуний ҳукм, ҳал қилув қарори, ажрим ёки қарор чиқарилишига эришиш мақсадида судья ёки халқ маслаҳатчисига турли шаклда қонунга хилоф равишда таъсир ўтказганлик учун жавобгарлик белгиланмоқда.

Йиғилишда мувофиқликни баҳолаш органларининг масъулиятини янада ошириш ҳамда маҳсулотларни ўз ихтиёри билан чақириб олган тадбиркорларга енгиллик беришга қаратилган қонун лойиҳаси иккинчи ўқишда кўриб чиқилди. Ушбу қонун лойиҳаси билан битта кодекс ҳамда учта қонунга мувофиқликни баҳолаш органлари масъулиятини ошириш, тадбиркорлик субъектларини тегишли талабларга номувофиқ бўлган маҳсулотларни ўз ихтиёри билан савдодан чақириб олишни рағбатлантиришга қаратилган ўзгартиришлар ва қўшимчалар киритилмоқда.

Қонунчиликка киритилаётган ўзгартишга кўра, эндиликда иш вақтидан ташқари ишнинг бир кунда биринчи икки соати учун камида бир ярим ҳисса миқдорида, икки соатдан ортиқ қисми учун камида икки ҳисса миқдорида (меҳнат шароитлари ноқулай бўлган ишларда – ҳар бир соати учун камида икки ҳисса миқдорда) ҳақ тўланиши белгиланмоқда. Иш вақтидан ташқари ишнинг давомийлиги ходим учун сурункасига икки кун давомида тўрт соатдан (меҳнат шароитлари ноқулай бўлган ишларда – бир кунда икки соатдан) ошмаслиги кераклиги назарда тутилмоқда.

Мажлисда яна бир муҳим ҳаётий масала – тазйиқ ва зўравонликдан жабрланган шахсларга ижтимоий хизматлар кўрсатиш тизимини янада такомиллаштиришга қаратилган қонун лойиҳаси иккинчи ўқишда моддама-модда кўриб чиқилди.

«Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонун лойиҳаси билан эса бир қатор қонун ҳужжатларига узлуксиз тўқсон кун ва ундан ортиқ муддат давомида чет элда бўлиб қайтган ўн саккиз ёшдан олтмиш ёшгача бўлган Ўзбекистон Республикаси фуқаролари, Ўзбекистон Республикаси ҳудудида доимий яшайдиган чет эл фуқаролари ва фуқаролиги бўлмаган шахслар ҳамда меҳнат фаолиятини амалга ошириш учун республикамизга кириб келаётган чет эл фуқаролари ва фуқаролиги бўлмаган шахсларни мажбурий равишда ОИВга тиббий текширувдан ўтказишга оид нормалар киритилмоқда.

ОИВга мажбурий тиббий текширув давлат бюджети маблағлари ҳисобидан, меҳнат фаолиятини амалга ошириш учун мамлакатимизга кириб келаётган чет эл фуқаролари ва фуқаролиги бўлмаган шахслар ҳамда Ўзбекистон Республикасида доимий яшайдиган чет эл фуқаролари эса – ўз маблағлари, иш берувчининг ёки қонунчиликда тақиқланмаган бошқа маблағлар ҳисобидан амалга оширилиши назарда тутилмоқда.

Йиғилишда кўриб чиқилган ҳар бир масала – жамиятнинг реал эҳтиёжлари, одамлар ҳаётига дахлдор муаммоларнинг ечими йўлидаги қадамлардир. Ишончимиз комилки, қабул қилинаётган қонунлар амалий ижроси билан халқ фаровонлиги, адолат ва барқарорлик йўлида хизмат қилади.