Жорий йилда ўтказиладиган Ўзбекистон Республикаси Президентлигига сайлов мамлакатимизда фаолият юритаётган барча сиёсий партиялар учун муҳимдир. Зотан бундай катта ва қийин танлов мамлакат келажагига дахлдор, халқнинг ишончини қозонишда муҳим қадам.

Кеча Тошкент шаҳрида Ўзбекистон Экологик партияси пленуми бўлиб ўтди. Унда Ўзбекистон Экологик партиясининг Ўзбекистон Республикаси Президенти сайловидаги иштирок этиши билан боғлиқ масала муҳокама қилинди.
Пленумда Ўзбекистон Экологик партияси Марказий Кенгаши аъзолари, Олий Мажлис Қонунчилик палатаси депутатлари, ҳудудий партия ташкилотлари раҳбарлари, партия фаоллари ҳамда оммавий ахборот воситалари вакиллари иштирок этди.
Қайд этилганидек, 2021 йилда мамлакатимизда биринчи маротаба Президент сайлови Ўзбекистон Республикаси Сайлов кодекси асосида ўтказилмоқда. 2021 йил 23 июль куни Марказий Сайлов комиссияси томонидан Ўзбекистон Республикаси Президенти сайлови бошланиши эълон қилинди. Бугун юртимизда сиёсий партиялар ва фуқаролар сайлов ҳуқуқларини амалга ошириш учун зарур шароитлар яратилган. Президент сайловини кўп партиявийлик, партиялараро эркин рақобат, очиқлик ва ошкоралик тамойиллари асосида ўтказиш учун барча имкониятлар бор.
Янги Ўзбекистон тарихида илк бор янги сиёсий куч – Ўзбекистон Экологик партияси Ўзбекистон Республикаси Президенти сайловида иштирок этади. Бу мамлакатда тобора долзарб бўлиб бораётган экологик муаммоларни ҳал этиш, жамиятда аҳолининг эътиборини экологик муаммолар ва уларнинг ечимига қаратиш, инсон саломатлигини асраш ва соғлом турмуш тарзини таъминлаш борасида жамият олдида турган ўта муҳим масалаларни ҳал этишни ўз зиммасига олган ҳолда партия учун муҳим аҳамиятга эга.
Экологик партия президентлик сайловида ушбу долзарб масалаларни ўзида акс эттирган дастур билан иштирок этади.
Пленумда партиянинг Ўзбекистон Республикаси Президенти сайловида иштирок этиши ҳамда Ўзбекистон Республикаси Президенти сайловига номзод кўрсатиш таклифини съезд муҳокамасига киритиш бўйича қарорлар қабул қилинди.

Ўзбекистон Экологик партияси Марказий Кенгаши Ижроия қўмитаси раиси  Обломуродов Нарзулло
Наимович  номзоди Ўзбекис­тон Республикаси Президенти сайловида иштирок этиш учун партиянинг навбатдаги съезди муҳокамасига тақдим этилади.

Пленумда сўзга чиққан Марказий Кенгаш аъзолари, партия фаоллари бу масалада таклиф этилаётган номзод ҳамда унинг олдида турган муҳим вазифаларни бажаришда биргаликда ҳаракат қилиш лозимлиги бўйича таклифлар билдиришди.
Пленумда партиянинг навбатдан ташқари III-съездини чақириш, съезднинг кун тартиби ҳамда унга делегатларни сайлаш меъёри, ҳудудий партия ташкилотлари конференцияларини ўтказиш ва бошқа масалалар кўриб чиқилди.
Унга кўра партиянинг съездини жорий йил август ойининг охирида Тошкент шаҳрида чақириш бўйича қарор қабул қилинди.
Шунингдек, пленумда Ўзбекистон Экологик партиясининг янги намунадаги рамзи тасдиқланди, партия Марказий Кенгаши таркибига ўзгартишлар киритилди. 
Кун тартибидаги масалалар бўйича ҳудудий партия ташкилотлари олдига тегишли вазифалар қўйилди. Муҳокама қилинган барча масалалар юзасидан Ўзбекистон Экологик партияси Марказий Кенгаши пленуми тегишли қарорларни қабул қилди.

Саидрасул САНГИНОВ, 
Ўзбекис­тон Экологик партияси Марказий Кенгаши Ижроия қўмитаси раиси ўринбосари:
– Партиямиз мамлакатимиздаги экология ва атроф муҳитни муҳофаза қилиш, аҳолининг экологик хавфсизлигини таъминлаш, чекка қишлоқларгача тоза ичимлик сув етказиб бериш каби масалаларни доимий равишда кун тартибига қўйиб, тегишли мутасаддилар, жамоатчилик эътиборини қаратиб келмоқда. Чиқиндилар билан боғлиқ муаммоларни ҳал этишда ҳам бир қатор самарали лойиҳаларни амалга оширяпмиз.
Экопартия сайловда ўз номзоди билан иштирок этар экан, мамлакатимиз ижтимоий-сиёсий ҳаётида муҳим бўлган экологик муаммолар ва уларнинг ечимига оид аниқ таклифларни кенг жамоатчилик эътиборига ҳавола этади.
Қонунчиликка мувофиқ, Ўзбекис­тон Республикаси Президентлигига номзод партиянинг юқори турувчи органи, яъни партия съезди томонидан кўрсатилди. Биз бугун партия съезди муҳокамасига киритиш учун Ўзбекистон Экологик партиясидан Ўзбекистон Республикаси Президентлигига номзодни тасдиқладик.

Борий АЛИХАНОВ, 
Олий Мажлис Сенати аъзоси:
– Икки ярим йил аввал юксак мақсадлар билан Ўзбекистон Экологик партияси ташкил қилинган эди. Ўтган даврда партия синовларда тобланиб, қийинчилик билан оёққа турди. Парламент ва маҳаллий кенгашларга ўтказилган сайловларда номзодлари билан қатнашди ва муносиб ўринларни эгаллади.
Бугун мамлакатимизда амалга оширилаётган ислоҳотларнинг муҳим бир йўналиши бу – оқилона ва изчил экологик сиёсат олиб борилаётганидир. 2021 йил 18 май куни БМТ Бош ассамблеяси Оролбўйи минтақаси бў­йича махсус резолюция қабул қилгани ҳамда Оролбўйи минтақаси экологик инновация ва технологиялар ҳудуди деб эълон қилингани ҳам бунинг яққол далилидир. Оролбўйи ҳудудида олиб борилаётган ишлар, «Мўйноққа мадад» каби акцияларнинг ташкил этилиши ортида катта меҳнат, саъй-ҳаракат ётибди. Олдимизда халқ ишончини оқлаш йўлида қилинадиган ишлар ҳали бисёр. Сайловларда иштирок этиш эса, Ўзбекистон Экологик партиясининг зиммасидаги улкан масъулият десак, хато бўлмайди.
Дунё бўйлаб тўқсондан зиёд яшиллар партиялари мавжуд, уларнинг элликка яқини парламентда иштирок этиш ҳуқуқига эга. Биз эса Ўзбекистон Республикаси Президентлигига номзод кўрсата оладиган даражада юқори натижага эришмоқдамиз. Бу Экопартия дас­туридан ўрин олган муҳим йўналишларни амалга ошириш ва яшил иқтисодиётни ривож­лантиришга хизмат қилади.

Моҳира ХОДЖАЕВА, 
Олий Мажлис Қонунчилик палатаси депутати, Ўзбекистон Экологик партияси фракцияси аъзоси:
– Ўзбекистон Экологик партияси нисбатан ёш бўлишига қарамай, мамлакатимиздаги сиёсий жараёнларга дадил қадамлар билан кириб борди. «Яшил» технологияларни кенг жорий қилиш ва «яшил» энергетика соҳасидаги лойиҳаларни амалга ошириш Ўзбекистонда яқин ўн йилликнинг асосий мақсади сифатида эътироф этилмоқда. Мана шу жараёнда партия­миз ўзининг позициясида мустаҳкам туриши катта аҳамият касб этади.
Экологик муаммоларни бартараф этишда мавжуд қонунчилик ҳам бизга етарлича ҳуқуқий йўл очиб бериши керак. Сайловларда иштирок этиш эса ҳар бир сиёсий партиянинг дастурий мақсадларини ҳаётга татбиқ этишга кенг йўл очади.

Низомиддин БАКИРОВ, 
Ўзбекистон Респуб­ликаси Ўрмон хўжалиги давлат қўмитаси раиси:
– Экологик партия ташаббуси билан Оролбўйида, Мўйноқда бошланган катта ло­йиҳалар бугун республика бўйлаб кенг қулоч ёзмоқда. Тоғ ва тоғ олди ҳудудларимизда катта майдонларда экологик муҳитни яхшилаш бўйича чора-тадбирлар амалга оширилмоқда. Бундан ташқари Ўзбекистон Республикасида Ўрмон хўжалиги тизимини 2030 йилгача ривожлантириш концепциясини ишлаб чиқишда ҳам Ўзбекистон Экологик партиясининг муносиб ҳиссаси бор.
Бугун партиямиз мана шундай катта сиёсий жараёнларга кириб бормоқда экан, энг долзарб бўлиб турган экологик муаммоларни кун тартибига олиб чиқиши зарур. Айни вақтда халқимиз турмуш фаровонлигини яхшилаш учун янги-янги лойиҳаларни илгари суриш учун ҳам катта имконият бу сайловлар.
Бугун глобал миқёсда кечаётган қурғоқчиликка, иқлим ўзгаришларига қарши курашиш масалаларида Ўзбекистонни намуна сифатида кўрсата олишимиз зарур. Ўйлайманки, бунда Ўзбекистон Экологик партиясининг роли катта бўлиши шарт.