Истеъмол талаби ва кутилмаларини миқдорий ва сифат жиҳатдан баҳолаш ҳамда харид ва жамғаришга бўлган мойиллигини кузатиб бориш мақсадида аҳолининг истеъмол кайфияти индекси ҳисоблаб чиқилди.

Сўровлар республиканинг барча ҳудудларида турли соҳа вакилларини қамраб олган ҳолда Марказий банк телеграм канали орқали онлайн ҳамда жойларда юзма-юз интервьюлар ўтказиш орқали амалга оширилди. Сўровда жами 5 717 та респондентлар иштирок этди. Индекс кўрсаткичи +100 га яқинлашгани сари истеъмол кайфиятидаги ижобийликни ифода этиб, аҳолида келгусида иқтисодий вазиятнинг яхшиланиши бўйича кутилмаларнинг шаклланганини билдиради.

Истеъмол кайфияти индекси — аҳолининг келгуси 12 ой учун даромадлари, харажатлари, жамғармалари ҳамда кредитга бўлган талаби бўйича кутилма лари баҳоланиб, респондентларнинг тегишли саволларга «сезиларли даражада камаяди», «бироз камаяди», «ўзгаришсиз қолади», «бироз кўпаяди» ва «сезиларли даражада кўпаяди» деган жавобларига сифат нуқтаи назаридан вазн бериш орқали ҳисобланган.

2020 йилнинг IV чорак якунлари бўйича келгуси 12 ой учун истеъмол кайфияти индекси ижобий 24,2 ни ташкил этди.

Индекс таркибида келгуси 12 ойда харажатлар ўсишининг кутилиши энг юқори кўрсаткич – 45,7 ташкил қилган бўлса, даромадлар ўсиши ва кредитлар миқдори ортишининг кутилиши мос равишда 26,5 ва 28,4 тенг бўлди. Бу кўрсаткичлар, сўровда иштирок этган респондентларда харажат қилишга мойилликнинг юқорилиги, олинадиган даромадлар бўйича ижобий ўзгаришларнинг кутилиши ва кредитларга бўлган талабнинг ортаётганини билдиради.