«Инсонларнинг дарду ташвишларини ўйлаб яшаш – одамийликнинг энг олий мезонидир. Халқимиз ўз ҳаётида ижобий ўзгаришларни эртага эмас, узоқ келажакда эмас, айнан бугун кўриши керак».

Президентимизнинг халқ қалби ва онгидан чуқур жой олган бу сўзлари бугун мамлакатимизда барча соҳа ва тармоқларда амалга оширилаётган туб ўзгаришлар, ислоҳотлар ва янгиланишларни ҳаракатлантирувчи қудратли кучга, унинг ғоявий ўзагига айланди. Президент виртуал қабулхонаси ва Халқ қабулхоналари инс­титути бунинг яққол далилидир.
Ўзбекистон Респуб­ликаси Президенти маслаҳатчиси Т.Худойбергеновнинг 2019 йил 22 мартдаги топшириғига асосан, аҳолининг турли қатламлари билан тўғридан-тўғри мулоқотни кенгайтириш, мавжуд долзарб муаммоларни аниқлаш, уларни бевосита жойида бартараф этиш юзасидан аниқ ва тезкор чоралар кўриш мақсадида Сирдарё вилоятида Ўзбекис­тон Республикаси Президенти Админстрацияси, қатор вазирликлар раҳбариятининг жойлардаги халқ қабулхоналари билан биргаликдаги шахсий сайёр қабуллари бўлиб ўтмоқда, дея хабар берди ЎзА.
Навбатдаги оммавий сайёр қабул Ховос, Сардоба туманлари ҳамда Янгиер шаҳри аҳолиси учун ташкил этилди. Фуқароларнинг муаммо ва таклифлари атрофлича ўрганиб чиқилди.
Ўтказилган қабул давомида жами 3 минг 76 та масала бўйича мурожаатлар қабул қилиниб, улардан 1 минг 17 таси ёки 33,1 фоизи жойида ижобий ҳал қилинди, 785 та ёки 25,5 фоиз мурожаатга зарур тушунтиришлар берилди. 1 минг 274 та ёки мурожаатларнинг 41,4 фоизи ижро учун назоратга олинди.
Очиқ мулоқот шаклида ташкил этилган ушбу қабулда Сирдарё ҳамда Сайхунобод туманларидан 271 нафар фуқаронинг 268 га яқин мурожаати тингланиб, уларга ижобий ечим топиш бўйича тегишли вазирлик, муассаса, корхона ва ташкилотлар раҳбарларига аниқ топшириқлар берилди.
Мисол учун, Оқолтин тумани Навоий номидаги маҳалла фуқаролар йиғинида истиқомат қилувчи Унсиной Абдуназарова кам таъминланганлар рўйхатига киритишда амалий ёрдам сўради. Гулистонлик Людмила Кимга мерос гувоҳномасини расмийлаштириш масаласида ҳуқуқий маслаҳат берилди. Мирзаобод тумани Дўнг­ариқ маҳалласидан Ёқубжон Абдуллаев тадбиркорлигини ривожлантириш, новвойхонаси учун ун харид қилиш масаласида мурожаат қилди. Ширин шаҳрида истиқомат қилувчи Зиёда Турсинбоева арзонлаштирилган уй-жой харид қилишда амалий ёрдам сўраб мурожаат қилди. Ширин шаҳар Фарҳод маҳалласида истиқомат қилувчи А.Ҳатамов отасининг номидаги уйни ўз номига ўтказиш масаласида ҳуқуқий маслаҳат сўраб мурожаат қилди.
Сайёр қабул жараёнида фуқаролар асосан, доимий иш ўрни билан таъминлаш, субсидия маблағлари ажратиш, маошларнинг вақтида тўланмаслиги, банкдан кредит олишдаги муаммолар ва шу каби масалаларда мурожаат қилди.
Мурожаат этганлардан 20 нафардан ортиғи доимий ишга, 10 нафари ўқишга йўлланма олди, 10 дан ортиқ фуқарога субсидия маблағлари ажратиладиган бўлди, 5 нафар мурожаатчининг корхонада ишлаган иш ҳақини ундириб бериш ва қолган мурожаатлар ўрганиб чиқилиши вақт талаб этганлиги сабабли вилоят бандлик бош бошқармаси бошлиғи М.Муҳаммадиев томонидан назоратга олиниб, тегишли мутасаддиларга топшириқ ва вазифалар юклатилди, мурожаатларнинг аниқ ижро муддати белгиланди.
Ҳа, халқ дарди, муаммоларини ўрганиш фуқароларнинг жамиятга, эртанги кунга ишончи ортишига, ҳаёт даражаси, яшаш тарзи яхшиланишига хизмат қилади. Президентимизнинг таъбири билан айтганда, халқни рози қилсак – ишимизда унум ва барака бўлади.

А.ҚАЮМОВ