Иккинчи жаҳон уруши қатнашчилари ва ногиронлари 7,5 миллион сўмдан мукофот олади

Ўзбекистон Республикаси Президентининг «Хотира ва қадрлаш кунига тайёргарлик кўриш ва уни ўтказиш чора-тадбирлари тўғрисида»ги қарори қабул қилинди. Унга мувофиқ, 9 май – Хотира ва Қадрлаш куни байрами кенг нишонланади. Иккинчи жаҳон урушида фашизмга қарши курашишга ҳисса қўшган, мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилиш органлари ходимларининг хотирасини абадийлаштириш, барча фахрийларга ҳурмат кўрсатишга қаратилган кенг кўламли чора-тадбирлар амалга оширилади.
Ўзбекистон Президентининг 2019 йил 23 апрелдаги «Иккинчи жаҳон уруши қатнашчиларини рағбатлантириш тўғрисида»ги фармонига асосан Иккинчи жаҳон уруши қатнашчилари ва ногиронларига 7 500 000 (етти миллион беш юз минг) сўм миқдорида бирйўла пул мукофоти берилади. Ушбу пул мукофотлари тегишли вазирлик ва идоралар томонидан уруш қатнашчилари ва ногиронларига тантанали ва байрамона вазиятда топширилади.
Мамлакатимизда бу йилги байрам тантаналари «Аждодларни хотирлаш — муқаддас қадрият», «Эътибор ва ғамхўрлик — инсоний бурч» шиорлари асосида ташкил этилади. 
Иккинчи жаҳон урушининг ҳар бир қатнашчисига, фронт орти меҳнат фахрийларига, мустақиллик йилларида хизмат бурчини бажариш чоғида ҳалок бўлган ҳарбий хизматчилар ва ҳуқуқни муҳофаза қилиш органлари ходимларининг оила аъзоларига моддий ва маънавий ёрдам кўрсатиш ва байрам билан қутлаш мақсадида тегишли вазирликлар, идоралар ва бошқа ташкилотлар, ҳарбий қисмлар вакиллари уларнинг яшаш жойига ташриф буюради. Ёлғиз ва кам таъминланган Иккинчи жаҳон уруши қатнашчиларининг турар жойи ва уй хўжаликларини таъмирлаш, ободонлаштириш бўйича тегишли чора-тадбирлар амалга оширилади.
Иккинчи жаҳон уруши қатнашчилари ва ногиронларининг ҳар бирига тиббий ва ижтимоий хизмат кўрсатиш, уларни парвариш қилиш мақсадида тиббий билимларга эга ходимлар бириктирилиб, доимий равишда патронаж хизмати ташкил қилинади.
Ўзбекистон Республикаси Мудофаа вазирлиги томонидан 2019 йил 9 май соат 21.00 да Тошкент шаҳрида Хотира ва Қадрлаш кунига бағишланган байрам салюти ташкил қилинади.