Уй-жойга муҳтож ҳар бир оила «ватан»ли бўлишни орзу қилади. Йиллар давомида қийинчилик билан эришган бу орзуси – янги уй-жойга энди эга бўлдим деганда, у сифатсиз чиқиб, тез орада тўкилиб қолса-чи? Қурувчи ташкилотлар биздан уй-жойни қабул қилиб олганингизда яхши эди-ку, дея муаммони ўзидан соқит қилса? Унда уй эгаси арз-додини қаерга айтади?

— «Қишлоқ қурилиш инвест» инжиниринг компанияси қурилаётган ҳар бир уй-жойларни тендерга қўйиб, пудратчи ташкилотларни қурилишга жалб этади, — дейди «Қишлоқ қурилиш инвест» инжиниринг компанияси бош муҳандиси Шуҳрат РУСТАМОВ Миллий матбуот марказида журналистлар билан учрашувда. — Албатта, қурилган уй-жойларга пудратчи қурилиш ташкилоти жавоб беради. Қурилган уй-жойлар қанчалик сифатли эканини эса назорат комиссияси текширади.

— Қишлоқ жойларда намунавий лойиҳалар асосида қуриб, фойдаланишга топширилаётган арзон уй-жой эгаларидан сифатсиз қурилган уй-жойлар юзасидан келиб тушадиган мурожаатлар мониторинг қилинадими? Уй-жойларда камчилик аниқлангандан сўнг, зарар қоплаб бериладими?

— Қурилган арзон уй-жой эгаларидан келаётган мурожаатлар мониторинг қилиб борилади. Ҳар бир мурожаатни ўрганиш ва юзага келган муаммоларни ҳал қилиш мақсадида компаниямизда мурожаатларни ўрганиш бўлими иш олиб боради. Агар арзон уй-жой бўйича, муаммоли мурожаат келиб тушса, у тўлиқ ҳал этилмагунча комиссия ўз ишини тўхтатмайди.

Мабодо қурувчи ташкилот билан тузилган шартнома асосида уй-жойлар ўз вақтида қуриб битказилмаса ҳамда ўз ишига масъулиятсизлик билан қараб, уй-жой қурилиши учун керак бўладиган хомашёлардан «уриб қилиш» ёки ўғрилаш ҳолати аниқланса у қурувчидан воз кечилади. Ундан ўғриланган маҳсулотлар суд орқали ундириб олинади.

 Шунингдек, арзон уй-жойлар қурилиши тўхтаб қолмаслиги учун «Қишлоқ қурилиш инвест» инжиниринг компаниясининг захира  фондидан уй-жойлар ўз вақтида ва сифатли қуриб битказилиши учун маблағлар ажратилади.

— Жорий йилда қанча арзон уй-жой қурилиши белгиланган? Ва бу арзон уй-жойлар кимларга берилади?

— Ўзбекистон Президентининг 2018 йил 24 ноябрдаги «Қишлоқ жойларда ва фуқароларнинг айрим тоифалари учун арзон уй-жойлар қуришни кенгайтиришга оид қўшимча чора-тадбирлар тўғрисида»ги қарорига асосан, жорий йилда республикамизнинг қишлоқ массивларида жами 13 мингта намунавий лойиҳалар асосида арзон уй-жойлар қурилиши кўзда тутилган. Жумладан, 2 минг 992 та 1 қаватли 3 хонали 2 сотихли арзон уйлар. Шундан, 417 та 4 қаватли 24 хонадонли уйлар қурилади. Ушбу қурилаётган уй-жойларнинг 11 минг 70 таси уй-жой шароитини яхшилашга муҳтож оилалар учун, 658 таси алоҳида намуна кўрсатаётган ёш оилалар учун, қолган 1 минг 272 таси оғир ижтимоий вазиятга тушиб қолган аёллар учун мўлжалланган.

— Нега кўпқаватли уй-жойлар кенг кўламда қурилиши амалга оширилмоқда?

— Аввалари ҳам кўп қаватли уй-жойлар қурганмиз. Биз қурган уй-жойларимиз ҳудудида газ, электр энергияси, сув ва канализация тармоғи бор эди. Эндиликда, коммунал хизматлари бўлмаган ҳудудда кўпқаватли арзон уй-жойларни қуриб, у ерга канализация, сув, газ, электр энергияси линияларини тотиб боряпмиз. Қисқача айтганда, энди янги уй-жойлар коммунал хизматлари билан биргаликда қурилади.

Бекзод Насимбоев,

 «Оила даврасида» мухбири