Янги йил байрамини ҳамма орзиқиб кутади. Хаёлан қандайдир мўъжизалар рўй беришини, совғалар олишни истайди. Шундай вақтда одамлар бир-бирини хурсанд қилишга, ўзаро меҳр улашишга ҳаракат қилишади. Айниқса, кўнгли ярим, эътиборга муҳтож кишиларга яхшилик қилиш жуда хайрли иш.

Шу мақсадни кўзлаб Тошкент шаҳридаги 505 та маҳалла фуқаролар йиғинида «Маҳаллада Янги йил» лойиҳаси ўз ишини бошлади. Унга кўра, махсус Қорбобо кийимини кийган маҳалла посбонлари ва кўнгиллилар хонадонларга кириб барчани Янги йил билан қутлайди.

— «Маҳаллада Янги йил» деб номланган ушбу лойиҳа доирасида маҳаллаларда яшовчи ногиронлиги бўлган шахслар, кам таъминланганлар, юз ёшдан ошган ҳамда Иккинчи жаҳон уруши қатнашчилари уйларида байрам ташкиллаштирилади, — дейди Фуқароларнинг ўзини ўзи бошқариш органлари фаолиятини мувофиқлаштириш бўйича Тошкент шаҳар кенгаши бош мутахассиси Алишер ЁРМАТОВ. — Шунингдек,  жорий йилнинг 20-31 декабрь кунлари Тошкент шаҳри маҳаллаларида истиқомат қилувчи 12 ёшгача бўлган болаларга ҳар бир маҳалладаги маҳалла марказий биноси, кўчалар, кўп қаватли уйлар олдида ва болалар майдончаларида байрам тадбирлари ташкил этилиши режалаштирилмоқда.

Маҳалла фаоллари томонидан ташкиллаштирилаётган бу лойиҳа байрам арафасида кўпчиликнинг кайфиятини кўтаришига шубҳамиз йўқ. Зеро, айтишади-ку, янги йилни қандай кутиб олсанг, бутун йил шундай ўтади, деб.