Сўнгги пайтларда пойтахтимиз кўчалари, маҳаллалар ҳудудидаги кўплаб дарахтлар кесиб ташланмоқда. Бунинг бирор сабаби борми? Ахир, аксарият бундан норози бўлмоқда...

— Ҳеч бир дарахт ўзбошимчалик билан кесилмайди, бунга ҳеч кимнинг ҳаққи йўқ, — дейди Тошкент шаҳар Ободонлаштириш бош бошқармаси бошқарувчиси Абдувоҳид КАРИМОВ. — Бу ишга тегишли туман ҳокимликларининг экологик бўлимлари рухсат беради. Улар касалланган, қуриган, инсонда бирон бир аллергик хасталикни қўзғатишга мойил бўлган, электр симлари ёки газ қувурларига зарар етказадиган, умуман, аҳоли учун хавф туғдирадиган ҳолатдаги дарахтларни аниқлаб, бошқармамизга белгилаб беради. Шу асосда дарахтлар кесилади ёки чиройли шаклга келтирилади. Ҳали ҳеч ким шаҳар аҳолиси учун фойдаси тегадиган дарахтларни ўзбошимчалик билан кесмаган ва кесмайди ҳам. Буни аҳолимиз тўғри тушунишини истардик.

— Айни кунда йўллар ўртасига ўрнатилган темир панжаралар олиб ташланяпти. Улар келгусида қаерга ва нималарга ишлатилишини айта оласизми?

— Президентимизнинг виртуал қабулхонасига фуқаролардан бу борада келган мурожаатлар, қолаверса, ҳайдовчи ва йўловчиларга янада қулайлик яратиш мақсадида мазкур темир панжаралар ҳашар йўли билан олиб ташланмоқда. Улар туман ҳокимликлари тасарруфига ўтказилиб, турли бюджет ташкилотлари, жумладан, болалар боғчалари, шифохона, мактабларга берилади. Панжараларнинг яна бир қисмини катта сув каналлари атрофига ўрнатиш ҳам режалаштирилган.

Ўз мухбиримиз