Жазо чораси икки томон учун ҳам ишлаши керак

Одамлар қандай яшаётгани ва фаровонлик тенденциясини чиқинди мундарижасидан ҳам кўриш мумкин. Чиқинди муаммосининг пайдо бўлиши аҳоли даромадлари ўсишига нисбатан жуда сезгир ва юқори корреляцияга эга.

Шу маънода маиший чиқинди бўйича қарздорлик мавжуд бўлса, кўчмас мулк ва автомобиль олди-сотди шартномаси нотариал тасдиқланмаслиги, чиқиндидан қарзи борлар электр таъминотига тўлов қилолмаслиги қоидаларининг киритилиши тўғри ва жуда зарур. Ёмон қарздорлар тизимли жазоланиши, қатор ҳаракатларда чекланиши керак.

Маиший чиқинди учун қарзини тўламаётган истеъмолчини жазолаш тўғри, лекин масъулиятли истеъмолчи ёмон хизмат кўрсатувчини жазолай олмаслиги эътирозли. Тушунтираман.

Тошкент шаҳрида маиший чиқиндиларни олиб чиқиб кетиш анча самарали йўлга қўйилган. Лекин Тошкент вилояти туманлари ва вилоятларда аҳвол ўта қониқарсиз.

Биринчи муаммо маиший чиқиндиларни олиб чиқиб кетиш бўйича аҳоли яшайдиган массивлар тўлиқ қамраб олинмаган. Бу ҳудудларда чиқинди ё ёқилади ёки ноқонуний тарзда ёввойиларча дала, кўча, ариқ четларига улоқтирилади, ташлаб кетилади.

Иккинчидан, шартнома мавжуд ҳудудларда ҳам чиқинди ойлаб олиб чиқиб кетилмайди. Айниқса, ёз ойларида чиқинди умуман олиб кетилмаслиги одатга айланган. Юқори ҳарорат туфайли бу вақтда чиқинди 3 кунда сасийди ва ҳавони, сувни, тупроқни булғашни бошлайди.

Учинчидан, ёмон хизмат кўрсатаётган ё умуман хизмат кўрсатмаётган чиқинди тўплаш ва олиб чиқиб кетиш корхоналарини жазолаш тизими ишламайди. Тўловлар яхши йиғилмайдиган ҳудудларга «сендан угина, мендан бугина» ақидасига амал қилиб чиқинди йиғувчилар қадам босмайди. Бундай ёндашувдан ўша ҳудудлардаги қарздор истеъмолчи эмас, яхши истеъмолчилар жазоланади. 1055 орқали ёки бошқа ташкилотларга мурожаатлар умуман иш бермай қўйган. Тескари алоқа йўқ. Демак, худди газ, электр таъминотчиларидаги каби тескари алоқаниям йўлга қўйиш вақти етди.

Манба: «bakiroo» телеграм канали