Америка ва Британия олимлари биргаликда тадқиқот ўтказишиб, қайси мамлакатларда экологик вазият ёмонлашиши натижасида яшаш қийинлашиб кетишини аниқладилар, дейилади ЎзАнинг жаҳон хабарларида.

Маълум бўлишича, сайёрамизда одамлар жуда оғир ва экстремаль шароитда истиқомат қилишга тўғри келаётган жойлар аллақачон пайдо бўлган.
Мутахассислар дунёнинг интерактив харитасини ишлаб чиқди. Унда ҳар бир минтақа учун ҳароратнинг максималь комбинацияси ва намлик нисбати акс эттирилди. Ушбу кўрсаткич инсон организмига тушаётган иқлим оғирлигини ўзида акс этади. Тадқиқот натижалари Science Advances журналида эълон қилинди.
«Бундан аввал биз бир неча ўн йилдан кейин нима юз беришини башорат қилган эдик, бироқ энди кўряпмизки, ҳозирданоқ катта ўзгаришлар рўй бермоқда», дейди Колумбия университети илмий ходими, мазкур мақоланинг муаллифи Колин Рэймонд.
Тадқиқот муаллифларининг эътибор беришича, экстремаль ҳарорат ва намликнинг нисбати улар кузатувни олиб борган вақт мобайнида икки баробарга ортган. Олимлар тузган жадвалда иқлим ўзгаришлари натижасида одамларнинг яшаши қийин бўлиб кетадиган жойлар ва мамлакатлар рўйхати қўйидагича келтирилган:
1. Форс ва Мексика кўрфази соҳилларига яқин жойлар, Ҳинд океани соҳиллари.
2. Ҳиндистон, Бангладеш ва Покис­тоннинг катта қисми.
3. Қизил денгиз соҳилларида ҳамда Калифорнияда.
4. Жануби-Шарқий Осиё, жанубий Хитой, субтропик Африка ҳудудларининг бир қисмида.
5. Кариб ҳавзаси ҳудудида.