Гиёҳванд моддалар савдосига айнан бир ташкилот ёки муассаса ходимлари кураши билан барҳам бериб бўлмайди.

Ўзаро ҳамкорликда, баҳамжиҳат амалга ошириладиган чора-тадбирлар орқали натижага эришиш мумкин. Шу мақсадда Ўзбекистонда гиёҳванд моддалар айланишига қарши курашувчи Идоралараро мобиль гуруҳлар фаолият бошлади. Унинг таркибига Ички ишлар вазирлиги, Давлат хавфсизлик хизмати ва Давлат божхона қўмитаси ходимларидан иборат олтита гуруҳ киради.

— Марказий Осиё давлатлари ҳудудлари орқали шимолий йўналиш бўйлаб ўтувчи наркотик моддалар контрабандасига қарши кураш ҳамон долзарб, — дейди Наркотик моддаларни назорат қилиш миллий маркази халқаро бўлими бошлиғи Азизбек ЭРКАБОЕВ. — Ўзбекистонда бундай моддаларнинг ноқонуний савдосига қарши курашиш мақсадида ҳуқуқни муҳофаза қилиш идораларининг техник салоҳияти ва касбий маҳоратини оширишда инновацион лойиҳалар жуда керак. Бирлашган Миллатлар Ташкилоти Гиёҳванд моддалар ва жиноятчилик бўйича бошқармасининг Ўрта Осиёдаги ваколатхонаси томонидан амалга оширилаётган ва Япония ҳукумати томонидан молиялаштирилган лойиҳа доирасида Республикамизнинг ҳуқуқни муҳофаза қилиш идораларига техник ускуналар ва автотранспорт воситалари тақдим этилди. Эндиликда Идоралараро мобиль гуруҳ вакилларига инновацион таълим берилиб, топширилаётган ускуналардан қандай фойдаланиш ўргатилади.

Мазкур ускуналарнинг умумий қиймати 1,1 миллион АҚШ долларга тенг бўлиб, улар замон талабига мос, илғор технологияларга асосланган. Идоралараро мобиль гуруҳ аъзолари фаолиятида бу технологиялар асқатади ва улардан унумли фойдаланилади. 

Ноилахон АҲАДОВА,