Олимлар Ўзбекистон табиатида яна бир ноёб жонивор мавжудлигини тасдиқлади. Узоқ йиллар давомида деярли учрамаган, ҳатто тирик ҳолда кузатиш имконияти жуда чекланган туркман узунқулоғи номли кўршапалак илк бор мамлакатимиз ҳудудида аниқланди.

Энг қизиғи, бу тур ҳақидаги маълумотлар ярим асрдан ортиқ вақт давомида асосан музей намуналарига таяниб келган.

Экология ва иқлим ўзгариши миллий қўмитаси маълумотига кўра, ноёб кўршапалак 2026 йил сентябрь ойида «Жанубий Устюрт» миллий табиат боғида Ўзбекистон Фанлар академияси Зоология институти олимлари томонидан ўтказилган экспедиция давомида топилган. Топилма Устюрт платосининг жанубий қисмида, Туркманистон билан чегарадош ҳудудда қайд этилган.

Туркман узунқулоғи Марказий Осиёда учрайдиган энг кам ўрганилган кўршапалак турларидан бири ҳисобланади. Ушбу жонивор илк бор 1988 йилда зоолог Пётр Стрелков томонидан кулранг узунқулоқ кўршапалакнинг кенжа тури сифатида тавсифланган. Кейинчалик, 2006 йилда ўтказилган морфологик ва генетик тадқиқотлар натижасида у мустақил тур сифатида тан олинган.

Эътиборлиси, узоқ вақт давомида мазкур кўршапалакнинг табиатда учратилгани ҳақидаги сўнгги маълумот 1970 йилга тегишли бўлган. Шундан кейин 55 йил давомида унинг янги тирик намуналари қайд этилмаган. Олимлар бу тур ҳақидаги билимларни асосан музейларда сақланаётган намуналар орқали тўплашга мажбур бўлган.

2025 йил кузида Германия, Ўзбекистон ва Туркманистон олимларидан иборат халқаро тадқиқотчилар гуруҳи Туркманистоннинг Қорақум чўлида ушбу ноёб кўршапалакни қайта аниқлаган эди. Ўшанда олимлар илк бор унинг тирик вакилларини суратга ва видеога олишга, шунингдек, товуш сигналларини қайд этишга муваффақ бўлган.

Орадан бир йил ўтиб, Ўзбекистон олимлари ҳам мамлакатимиз ҳудудида ушбу тур мавжудлигини илмий жиҳатдан тасдиқлади. Бу эса туркман узунқулоғининг тарқалиш ҳудуди аввал тасаввур қилинганидан кенгроқ бўлиши мумкинлигини кўрсатади.