Тошкент шаҳрида жамоат транспорти ҳаракатини яхшилаш, тирбандликларни камайтириш ва автобуслар ҳаракатини тезлаштириш мақсадида алоҳида BRT йўлак­ларининг ташкил этилгани муҳим ва ижобий қадам бўлди. Йўловчилар ҳам ушбу янгиликни илиқ кутиб олмоқда.

Бироқ жамоат транспорти инфратузилмасини ривожлантириш фақат автобуслар ҳаракатини тезлаштириш билан чекланмаслиги керак. Йўловчиларнинг бекатларда кутиш вақтидаги хавфсизлиги, саломатлиги ва қулайлиги ҳам устувор аҳамиятга эга.

Айни кунларда ҳаво ҳарорати кес­кин кўтарилган бир шароитда пойтахтда янги қурилаётган аксарият бекатларда соя ва салқинлик етарли эмаслиги фуқароларнинг ҳақли эъти­розларига сабаб бўлмоқда. Очиқ ва қуёш нуридан етарлича ҳимояланмаган бекатлар, айниқса, кексалар, болалар, ҳомиладор аёллар ҳамда саломатлигида муаммоси бўлган фуқаролар учун жиддий ноқулайлик туғдириши мумкин.

Ўзбекистон Экологик партияси BRT тизимини янада ривожлантириш билан бир қаторда, унинг бекатларини ҳам замонавий, экологик ва иқлим шароитига мос талаблар асосида такомиллаштириш зарур, деб ҳисоблайди.

Дунё тажрибасида автобус бекатларини кўкаламзорлаштириш, уларнинг том қисмига ўсимликлар экиш, қуёш панеллари ўрнатиш, энергия тежамкор LED ёритиш тизимларидан фойдаланиш, соя ва табиий ҳаво айланишини таъминлайдиган конструкцияларни жорий этиш амалиёти кенг қўлланилмоқда.

Партиямиз Тошкент шаҳрида «Яшил бекат» лойиҳасини пилот тартибида йўлга қўйишни таклиф этади. Бунда дастлаб 10-20 та бекатда қуйидаги ечимларни синовдан ўтказиш мақсадга мувофиқ:

• қуёш нуридан тўлиқ ҳимоя қилувчи кенг ва иссиқликни қайтарувчи том конструкцияси;

• қуёш панеллари ва энергия тежамкор ёритиш тизими;

• иссиқ ва қуруқ иқлимга чидамли, кам сув талаб қиладиган маҳаллий ўсимликлар;

• табиий ҳаво айланишини таъминлайдиган очиқ ва хавфсиз конструкциялар;

• имкониятдан келиб чиқиб, велосипед турар жойлари ва ёмғир сувини йиғиш тизими.

Бунда Европа шаҳарларидаги тажрибани тўғридан-тўғри кўчириш эмас, балки уни Тошкентнинг жазирама ва қуруқ иқлимига мослаштириш муҳимдир. «Яшил бекатлар» нафақат йўловчиларга соя ва қулайлик яратади, балки шаҳар ҳавосидаги чангни камайтириш, кичик яшил ҳудудларни кўпайтириш, энергияни тежаш ва пойтахтнинг экологик қиёфасини яхшилашга ҳам хизмат қилади.

Шу муносабат билан мутасадди ташкилотларни янги қурилаётган ва фойдаланишга топширилган бекатларнинг қулайлиги, сояланиш даражаси ва иқлимга мослигини қайта кўриб чиқишга, фуқаролар фикрини ўрганишга ҳамда илғор экологик ечимларни жорий этишга чақирамиз.

Ўзбекистон Экологик партияси

Ахборот хизмати