Бугунги ҳаётимизни пластик пакетларсиз тасаввур қилиш қийин. Улар енгил, арзон ва қулай. Аммо ҳар бир қулайликнинг ўз баҳоси бор.

Бир неча дақиқа хизмат қиладиган пакетнинг табиатда юзлаб йиллар сақланиб қолиши инсоннинг истеъмолга муносабати ва табиат олдидаги масъулияти ҳақида жиддий ўйлашга ундайди. Бугун ташлаб юборилган оддий пакет эртанги кун экологияси, сув манбалари ва ҳатто инсон саломатлиги учун хавф манбаи бўлиши мумкин.

БМТ маълумотларига кўра, ҳар йили дунёда 5 триллионга яқин пластик пакет ишлатилади. Шу билан бирга, 8 миллион тонна пластик чиқинди денгиз ва океанларга тушади. Полиэтилен пакетлар табиий муҳитда парчаланиши учун 200 йилдан ортиқ, айрим пластик маҳсулотлар учун эса 450 йилгача вақт талаб этилади. Бу эса бир авлод ташлаб кетган чиқиндининг оқибатлари бир неча авлод ҳаётига таъсир қилиши мумкинлигини англатади.

Мутахассисларнинг ҳисоб-китобларига кўра, агар дунёда ишлатилган барча пластик пакетлар бир жойга йиғилса, уларнинг узунлиги Ер шарини 4200 марта айланиб чиқишга етар эди. Бу рақамлар муаммонинг кўламини яққол кўрсатади.

Ҳар йили 3 июль санаси Халқаро пластик пакетлардан воз кечиш куни сифатида нишонланади. Бу сана жамоатчилик эътиборини пластик чиқиндилар муаммосига қаратиш, аҳолини экологик масъулиятли ҳаёт тарзига ундаш ҳамда қайта ишлатиладиган экологик сумкалардан фойдаланиш маданиятини шакллантиришга хизмат қилади.

Экологик муаммоларни фақат қонунлар ёки технологиялар билан ҳал этиб бўлмайди. Бу, аввало, инсоннинг дунёқараши ва кундалик одатлари билан боғлиқ. Табиатга муносабат – бу маданият, масъулият ва келажакка бўлган ҳурмат мезони. Бир марта ишлатиладиган пластик пакетдан воз кечиш кичик қарор бўлиб туюлиши мумкин, аммо миллионлаб одамлар шундай йўл тутса, у катта экологик ўзгаришларга замин яратади.

Табиат биздан мураккаб ишларни эмас, оқилона танлов қилишни кутади. Бугун қўлимиздаги оддий экосумка эртанги куннинг мусаффо ҳавоси, тоза сув ва соғлом атроф-муҳит учун қўшилган муносиб ҳиссага айланиши мумкин.

Авлоқул ХУДОЙҚУЛОВ,

ЎЭП Қибрай туман партия ташкилоти раиси