Ёш депутат ва илмий фаолият билан шуғулланаётган инсон сифатида ушбу учрашувда илгари сурилган ташаббусларни катта мамнуният билан қабул қилдим. Айниқса, бугунги тараққиётнинг асосий омили сифатида билим, касб ва технология эътироф этилгани ҳар бир ёшнинг олдига улкан масъулият юклайди.

Давлатимиз раҳбари томонидан ҳар йили 500 минг нафар ёшни замонавий касбларга ўқитиш, 20 та олий таълим ташкилотида Сунъий интеллект лабораторияларини ташкил этиш, «TOP-100 ёш лидерлар» дастури, «Келажак билимлари экотизими» ва «Касб ваучери» каби инқилобий ташаббуслар эълон қилингани ёшлар салоҳиятини рўёбга чиқаришда янги босқични бошлаб беради.

Мулоқот давомида келтирилган натижалар ҳам эътиборга лойиқ. Сўнгги йилларда 287 мингдан ортиқ ёш тадбиркор фаолият бошлагани, 3,5 миллион ёш хорижий тилларни ўрганаётгани, ёшлар томонидан 434 та халқаро фан олимпиадаси ҳамда 2 245 та халқаро спорт медаллари қўлга киритилгани, шунингдек, 1,5 миллион нафар ёшнинг муаммолари «Ёшлар дафтари» орқали ҳал этилгани мамлакатимизда ёшларга бўлган ишонч амалий натижалар бераётганининг яққол исботидир.

Экологик партия вакили сифатида инсон ва табиат масалалари бугунги ривож­ланиш стратегиясининг ажралмас қисми эканини алоҳида таъкидламоқчиман. Сунъий интеллект, инновацион технологиялар ва илмий ёндашувни экологияни муҳофаза қилиш, яшил иқтисодиётни ривожлантириш, ресурслардан оқилона фойдаланиш ҳамда иқлим ўзгаришларига мослашиш жараёнларига кенг татбиқ этиш бугунги куннинг энг долзарб вазифаларидан биридир.

Ёшлар нафақат ислоҳотларнинг иштирокчиси, балки уларнинг асосий драйвери ва ташаббускори бўлиши керак. Илм-фан, экология, инновация ва жамоатчилик фаоллигини уйғунлаштирган ҳолда, Янги Ўзбекистон тараққиётига муносиб ҳисса қўшиш ҳар биримизнинг бурчимиздир.

Нодиржон ЁҚУБОВ,

халқ депутатлари

Яккасарой туман

Кенгаши депутати