Жаҳон бозорида бирор маҳсулотга харидор топиш осон эмас. Бунда юқори сифат ва қулай нарх муҳим аҳамиятга эга. Юртимизда етиштирилаётган қишлоқ хўжалиги маҳсулотларининг бундай сифатларга эгалиги мева-сабзавот, полиз экинларига талабнинг ортишига сабаб бўлмоқда.

Мамлакатимиз ўрик, олхўри, узум, ёнғоқ, карам ва бошқа кўплаб мева-сабзавот маҳсулотларини экспорт қилиш ҳажми бўйича дунёда етакчи ўнта давлат қаторига кирди. Зеро, юртимизда қишлоқ хўжалиги маҳсулотларини етиштириш, саноат усулида қайта ишлаш ва экспорт қилиш масалаларига алоҳида эътибор қаратилмоқда.

Шаҳрисабз туманида жорий йилда иш бошлаган «Шаҳрисабз мева-сабзавот» масъулияти чекланган жамияти агрофирмаси асосан, қишлоқ хўжалиги маҳсулотларини экспорт қилиш билан шуғулланмоқда. Ушбу тадбиркорлик субъекти жорий йил ҳисобидан чет эллик ҳамкорлар билан қиймати 5 миллион доллардан ортиқ миқдордаги маҳсулот сотиш бўйича келишувларга эга.

— Ҳозирга қадар хорижлик ҳамкорларга қарийб 80 минг долларлик маҳсулот етказиб берилди, — дейди агрофирма раҳбари Саиджон ­ШОКИРОВ. — Тез орада 60 тоннага яқин хурмо ва узум жўнатамиз. Россияга ёнғоқ, Афғонистон, Покистон ва Ҳиндистон мамлакатларига мош экспорт қилишни режалаштирганмиз. Корхонамизда мева қуритиш йўлга қўйилгани боис, катта миқдордаги олма ва олхўрини табиий усулда қуритдик. Уларни саралаб қутиларга жойлаяпмиз. Яқинда Уфа шаҳрида савдо уйимизни очдик. Хориждан мева қуритиш линияси, совутиш камераси ва пластмасса қути ишлаб чиқариш ускуналари олиб келмоқчимиз.

Умуман, Қашқадарё вилоятида жорий йилда 228,8 минг тонна мева-сабзавотни экспорт қилиш режалаштирилган.

— Айни пайтга қадар 16,7 миллион долларлик мева-сабзавот экспорт қилинди, — дейди вилоят ҳокимлиги ҳудудларни комплекс ривожлантириш йиғма бошқармаси етакчи мутахассиси Комил ТОЖИЕВ. — Биргина октябрь ойининг ўзида қишлоқ хўжалиги маҳсулотларини экспорт қилиш орқали 4,1 миллион долларлик валюта тушумини таъминлаш кутилмоқда.

Вилоят ҳокимлигидан олинган маълумотларга кўра, 2017 йил ҳосили учун 26,9 минг гектар майдонга экинлар экиш кўзда тутилган. Ҳозир апрель ойида ҳосилга кирадиган экспортбоп маҳсулотлар экиш бўйича ишлар бошлаб юборилган. Ажратилган ер майдонларининг 2 минг 570 гектарига пиёз, 3 минг 855 гектарига сабзи, 3 минг 855 гектарига лавлаги, 15 минг гектарига турли кўкатлар ва 1 минг 710 гектарига бошқа экинлар экиш режалаштирилмоқда.

Жорий йил пойтахтимизда ўтказилган I халқаро мева-сабзавот ярмаркаси доирасида вилоят тадбиркорлари 116,4 минг тонна қишлоқ хўжалиги маҳсулотларини хорижга экспорт қилиш бўйича салкам 114 миллион долларлик шартнома имзолади.

Ўлмас БАРОТОВ,

ЎзА мухбири