Бугунги кунда мамлакатимизда «яшил иқтисодиёт»га ўтиш ва қайта тикланувчи энергия манбаларидан самарали фойдаланиш давлат сиёсатининг устувор йўналишларидан бирига айланди.

Ушбу эзгу ташаббусларнинг амалий ифодаси сифатида Наманган вилоятининг Чуст туманида амалга оширилаётган «Чиқиндидан электр энергияси ишлаб чиқариш» лойиҳаси нафақат ҳудуд, балки республика миқёсидаги энг муҳим экологик ва энергетик қадамлардан бири бўлмоқда.

Туманнинг «Зарафшон» МФЙ ҳудудида ташкил этилаётган экосаноат зонаси учун ажратилган 15 гектар ер майдонининг 10 гектарида «Everbright Environmental Energy Namangan» МЧЖ ХК томонидан хитойлик инвесторлар билан ҳамкорликда йирик бунёдкорлик ишлари олиб борилмоқда. Умумий қиймати 150 миллион АҚШ долларини ташкил этувчи ушбу инновацион лойиҳа ишга туширилиши натижасида йилига 547,5 минг тонна чиқинди қайта ишланиб, жами 310 миллион кВт соат электр энергияси олиш имконияти яратилади.

Таъкидлаш жоизки, ишлаб чиқарилган энергиянинг 254 миллион кВт соати ягона электр тармоқларига узатилиши кўзда тутилган бўлиб, бу қарийб 300 минг нафар аҳолининг йиллик электр энергиясига бўлган эҳтиёжини тўлиқ қоплаш имконини беради. Лойиҳанинг энг муҳим жиҳати шундаки, у нафақат атроф-муҳит муҳофазасини таъминлаб, табиатга юкламани камайтиради, балки 180 нафар маҳаллий аҳолини доимий ва юқори технологик иш ўринлари билан таъминлаб, ҳудуднинг ижтимоий-иқтисодий ривожига катта ҳисса қўшади.