Табиат ва атроф-муҳитни муҳофаза қилиш бугун ҳар бир давлат ва жамият ҳаёти учун энг муҳим масалалар қаторида турибди.

Маълумотларга кўра, ҳар йили дунёда 7 миллион киши ҳаво ифлосланиши таъсиридан вафот этади. Газ ифлосланишидан келиб чиқадиган касалликларни даволаш учун йилига тахминан 1 триллион доллар сарфланади.

Мамлакатимизда ҳам экологик барқарорликни таъминлаш, аҳолининг қулай табиий муҳитга эга бўлиши учун зарур шарт-шароитлар яратиш, табиий ресурслардан оқилона ва самарали фойдаланиш, юзага келаётган экологик муаммоларнинг олдини олиш ва уларнинг салбий оқибатларини бартараф этиш масалаларига жиддий эътибор қаратилмоқда. 2030 йилгача Ўзбекистон Республикасининг атроф-муҳитни муҳофаза қилиш концепцияси ҳамда «яшил» иқтисодиётга ўтиш стратегияси қабул қилинган.

Экологик муаммоларнинг олдини олишда энг муҳим вазифалардан бири юртдошларимиз ва ёшларнинг экологик маданиятини юксалтиришдир. Бу борада жорий йил 15 май куни давлатимиз раҳбарининг қарори билан 2030 йилгача бўлган даврда аҳолининг экологик маданиятини юксалтириш концепцияси қабул қилинган.

Мазкур концепцияда белгиланган вазифаларни амалга ошириш ҳамда юртдошларимизнинг экологик маданиятини юксалтиришда инсон қалбига сўз орқали таъсир эта оладиган, табиатга меҳр ва эҳтиёткорлик туйғуларини уйғота оладиган шоир ва ёзувчилар, публицист ижодкорларнинг ўрни беқиёс.

Ўзбекистон Экологик партияси Фарғона вилоят кенгаши ташаб­буси билан Ёзувчилар уюшмаси ҳамкорлигида Марғилон шаҳрида «Ижодкорлар – экологик маданият тарғиботчиси» шиори остида ўтказилган ижодкорлар форуми бетакрор табиатимизни тараннум этиш, жамиятни мушоҳада ва мулоҳазага чорлаш йўлида муҳим қадам бўлди. Фарғона ва Андижон вилоятларидан атоқли ва ёш ижодкорлар, ижод мактаби ўқувчиларини жамлаган мазкур форумнинг очилиш маросимида сўзга чиққан Олий Мажлис Қонунчилик палатаси Экология ва атроф муҳитни муҳофаза қилиш масалалари қўмитаси раиси Хайрулло Ғаффоров, таниқли олим, профессор Сиддиқ Мўмин ҳамда «Қува ҳаёти» газетаси бош муҳаррири, шоира Зуҳра Алиева бу анжуман ижод ва экология уйғунлигини намоён этиши, жамиятда экологик онгни юксалтириш, табиатга меҳр ва масъулият туйғусини мустаҳкамлашга хизмат қилишини таъкидладилар.

Экологик партия томонидан экология йўналишидаги электрон адабиётларни жамлаган «Яшил жавон» иловасининг ишлаб чиқилгани ҳам форум иштирокчиларида партиянинг китоб ва китобхонларга бўлган ҳайрихоҳлигини яна бир амалий ифодаси сифатида юксак баҳоланди.

Тадбир жараёнида экология мавзусидаги шеърий чиқишлар, мусиқий ва саҳна кўринишлари, шунингдек, ижод мактаблари ўқувчилари томонидан тайёрланган бадиий намуналар намойиш этилди. Сув ресурсларини тежаш, ҳаво мусаффолигини асраш, яшил маконларни кўпайтириш ва чиқиндиларни камайтириш каби долзарб мавзуларда илгари сурилган экологик чақириқлар форум иштирокчиларида катта таассурот қолдирди.

Камолиддин РЎЗИМАТОВ,

Ўзбекистон Журналистлар уюшмаси аъзоси