Маҳаллаларда халқ депутатлари томонидан ўтказилаётган сайёр қабуллар аҳолининг ҳаётий муаммоларини тинглаш, уларга амалий ечим топиш ва ижтимоий адолатни таъминлашда муҳим механизмга айланди.

Пойтахтимизнинг «Янги Бунёдобод» МФЙда ўтган депутат қабулида халқ депутатлари Тошкент шаҳар Кенгаши депутати Нодир Юнусов ҳамда ЎЭП Тошкент шаҳар кенгаши раиси Севара Файзиева иштирок этиб, аҳоли билан очиқ ва самимий мулоқот ўтказишди.

Тадбирда маҳалла раиси, фаол фуқаролар, нуронийлар ва ёшлар қатнашиб, ҳудуддаги инфратузилма ҳолати, экологик барқарорлик ва ижтимоий соҳага оид долзарб масалалар юзасидан ўз мулоҳазаларини билдирдилар.

– Бундай очиқ мулоқотлар аҳолининг реал эҳтиёжларини тушуниш ва давлат органлари олдига аниқ вазифалар қўйиш имконини беради, – дейди депутат Н.Юнусов. – Мурожаатларнинг ҳеч бири эътибордан четда қолмайди. Муаммоларни ҳал этиш бўйича тегишли ташкилотларга депутатлик сўровлари юборилиб, уларнинг ижроси қатъий назоратга олинади.