Бугун саноат тармоқларини ривожлантиришда нафақат иқтисодий самарадорлик, балки экологик хавфсизлик меъёрларига риоя этиш ҳам устувор вазифага айланди. Экологик партия вакиллари томонидан ишлаб чиқариш корхоналарида ўтказилаётган ўрганишлар айнан шу мақсадга йўналтирилган.

Яқинда партиянинг Қашқадарё вилояти кенгаши ҳамда Қарши туман ташкилоти фаоллари ҳудуддаги «Iyman textile» ип-калава ишлаб чиқариш корхонаси фаолияти ва ундаги экологик ҳолат билан яқиндан танишдилар.

Маълумот ўрнида айтиш жоиз, 2025 йилда ташкил этилган ушбу корхона бугунги кунда тўрт сменада узлуксиз иш ташкил этган. Бир суткада 15 тонна ип-калава ишлаб чиқариш қувватига эга бўлган мажмуанинг йиллик экспорт ҳажми салмоқли: маҳсулотнинг 95 фоизи Туркия ва Хитой каби давлатларга йўналтирилмоқда. Корхонада 400 нафарга яқин маҳаллий аҳоли доимий иш ўрни билан таъминланган.

Ўрганиш давомида партия фаоллари корхонада экологик қонунчилик талабларининг бажарилишига алоҳида эътибор қаратди. Хусусан, тозалаш иншоотларининг техник ҳолати, ҳавони фильтрлаш тизимларининг самарадорлиги, чиқиндиларни бошқариш механизми ҳамда ички экологик назорат тизими батафсил таҳлил қилинди.

Мулоқот давомида корхона мутасаддиларига экологик назорат тизимини янада такомиллаштириш, ишлаб чиқаришга энергия тежамкор ва экологик хавфсиз технологияларни кенг жорий этиш юзасидан зарур тавсиялар берилди. Шунингдек, корхона атрофида «яшил белбоғ» ҳудудларини кенгайтириш ва мавжуд дарахтларни парваришлаш бўйича истиқболли вазифалар белгилаб олинди.