Глобал иқлим ўзгариши шароитида сув ресурсларидан, айниқса, ер ости захираларидан оқилона ва тежамкорлик билан фойдаланиш стратегик аҳамиятга эга. Бу жараёнда соҳадаги норматив ҳужжатлар ижросини таъминлаш ва тизимли мониторинг тадбирларини ўтказиш экологик барқарорликнинг асосий гаровидир.

Шу мақсадда Бухоро вилоятида ер ости сув ресурсларини муҳофаза қилиш ва улардан самарали фойдаланиш ҳолатини ўрганиш юзасидан навбатдаги жамоатчилик мониторинги ўтказилди. Ўрганиш ишлари «Ўзбекгидрогеология» давлат муассасасига қарашли Ғарбий Ўзбекистон дала гидрогеология экспедициясида ташкил этилди.

Мониторинг давомида мутахассислар ва партия фаоллари ер ости сувларини қидириш, захираларни баҳолаш ва доимий кузатиш (мониторинг) тизимининг бугунги ҳолати билан танишдилар. Шунингдек, сув олиш лимитларига риоя этилиши, мавжуд қудуқлар ва гидрогеологик объектларнинг техник созлиги атрофлича кўздан кечирилди. Айниқса, сув танқислиги кузатилаётган ҳудудларда амалга оширилаётган чора-тадбирлар ва соҳага оид меъёрий ҳужжатларнинг ижроси таҳлил қилинди.

Ўрганиш якунлари бўйича соҳани янада такомиллаштиришга қаратилган муҳим таклифлар илгари сурилди. Хусусан: тизимни тўлиқ рақамлаштириш ва масофадан назорат қилиш технология­ларини жорий этиш; замонавий бурғилаш ва ўлчов техникаларини харид қилиш; сув сифатини жойида аниқловчи мобил лабораториялар ташкил этиш ва уларни замонавий ускуналар билан таъминлаш долзарб аҳамиятга эга.