Маҳаллий кенгаш депутатлари масъулларни тинглади

Жамоатчилик назорати – жамиятнинг юзи, қиёфасини намоён этувчи муҳим ижтимоий институт саналади. Ўзбекистон Экологик партияси, жойлардаги депутатлик гуруҳлари томонидан айни шу йўналишда амалга оширилаётган ишлар аҳоли билан мулоқотларни мустаҳкамлаш, жойларда ижтимоий-иқтисодий, экологик муаммоларга ечим топиш, умуман партияни халққа яқинлаштиришда муҳим омил бўлмоқда.

Яқинда Ўзбекистон Экологик партияси Хоразм вилоят кенгаши ҳамда депутатлик гуруҳи ташаббуси билан Урганч шаҳридаги «Дўстлик» ва ННТлар уйи биносида вилоят Ўсимликлар карантини ва ҳимояси бошқармаси фаолияти юзасидан жамоатчилик эшитуви ташкил қилинди. Соҳага оид бир қанча муаммолар таҳлил қилиниб, уларни бартараф этиш юзасидан аниқ вазифалар белгиланди.

– «Ўсимликлар дунёсини муҳофаза қилиш ва ундан фойдаланиш тўғрисида»ги қонун талабларига риоя этилишини ўрганиш мақсадида ўтказилган ушбу тадбирда партиянинг туман ва шаҳар кенгашлари раислари, партия фаоллари, депутатлар иштирок этди. Тадбир давомида қонунчиликда белгиланган меъёрлар асосида экотизимни муҳофаза қилиш, биологик хилма-хилликни сақлаб қолиш, ўсимликларнинг касаллик ва зараркунандалардан асраш бўйича олиб борилаётган чора-тадбирлар юзасидан маълумот берилди, – дейди Хоразм вилоят Ўсимликлар карантини ва ҳимояси бошқармаси масъул ходими Ҳамид Машарипов.

– Бошқарма вакиллари билан мулоқот жараёнида «шаҳар мўйловдори» деб номланган ўта зарарли ҳашаротларга қарши курашиш чоралари бўйича талаб ва таклифларни ўртага ташладик. Ушбу ҳашаротга қарши кескин кураш олиб борилмаса, биз қанчалик «Яшил макон» лойиҳаси бўйича ишларни амалга оширмайлик, кутилган натижаларга эришолмаслигимиз мумкин, – дейди халқ депутатлари Хива туман Кенгаши депутати Фаррух Юсупов.

Халқ депутатлари Урганч шаҳар Кенгаши депутати Наргиз Шарипова атроф-муҳит яшил оламини талафотсиз сақлаш ва кенгайтиришда агрономлар ва кимёгар-мутахассисларнинг ўрни ҳақида алоҳида тўхталиб ўтди. Ёш кадрларни тайёрлаш ва уларнинг шаҳар ва туман марказлари табиатини бекаму-кўст асрашга жалб қилиш муҳимлигини таъкидлаган депутатнинг фикр-мулоҳазалари бошқарма вакиллари томонидан қўллаб-қувватланди.

– Келгусида бундай жамоатчилик эшитувларини изчил ўтказиб боришни аниқ режа-дастурга киритганмиз. Ўйлаймизки, бунинг натижасида Экологик партия илгари сураётган ғоя ва дастурлар ижроси таъминланиши билан бирга, давлат органлари устидан жамоатчилик назоратининг ўрнатилишига ҳам эришилади, – дейди ЎЭП Хоразм вилоят кенгаши масъул ходими Дилноза Холметова.

Эрпўлат БАХТ