Сўнгги йилларда иқлим ўзгариши ва экологик муаммолар глобал кун тартибининг ажралмас қисмига айланмоқда. Ўзбекистон ҳам бу жараёндан четда эмас.

Аҳолининг экологик онгини ошириш ва ёшларни табиатни асрашдек муҳим жараёнга жалб этиш мақсадида Ўзбекистон Экологик партияси томонидан Фарғона вилоятида кенг кўламли тадбирлар ва Ёшлар экофоруми ташкил этилди. Бу тадбирлар ёшларнинг экологик ҳаракатдаги етакчилик ролини яққол кўрсатиб берди.

Экология ва спорт

Тадбирларнинг бошланиши «Мусаффо табиат билан соғлом ҳаёт сари» шиори остидаги оммавий югуриш мусобақасидан старт олди. Ушбу оммавий акцияда 2000 нафардан зиёд талаба, ўқитувчи ва фаолларнинг «Истиқлол» стадионида бирлашиши шуни кўрсатдики, экологик муаммолар соғлом турмуш тарзи билан ҳам узвий боғлиқдир.

Тадбирнинг очилиш маросимида сўзга чиққан Ўзбекистон Экологик партияси Марказий Кенгаши раиси Абдушукур Ҳамзаев ва бошқа мутасаддилар бугунги кундаги ислоҳотларнинг негизида айнан экологик барқарорлик туришини таъкидлашди. Шу каби оммавий тадбирлар орқали аҳолининг табиатга бўлган муносабатини ўзгартириш ва уларда масъулият туйғусини шакллантириш муҳим эканлиги қайд этилди.

Экофорумнинг ғоялари

«Ёшлар бирдамлиги – яшил келажак пойдевори!» шиори остидаги ёшлар экофоруми эса илмий ва амалий ғоялар майдонига айланди.

Форум номига монанд «Соғлом ҳаёт учун 5000 қадам» акцияси билан бошланди. Юриш акцияси ўзига хос экологик фаоллик ташвиқоти бўлди.

Бундан ташқари, Фарғона давлат университетида ташкил этилган ёш олимларнинг инновацион ишланмалари кўргазмаси тадбирнинг илмий аҳамиятини оширди. Кўргазмада 30 нафар ёш тадқиқотчи ўзларининг экология соҳасидаги замонавий ва амалий ечимларини намойиш этишди.

Форумнинг муҳим нуқталаридан бири, Ўзбекистон Экологик партияси Марказий Кенгаши раиси, Олий Мажлис Қонунчилик палатасидаги партия фракцияси раҳбари Абдушукур Ҳамзаевнинг талабалар билан ўтказган очиқ мулоқоти бўлди. Самимий руҳда ўтган мулоқот чоғида ёшлар иқлим ўзгаришига қарши курашиш, чиқиндисиз ҳаёт тамойиллари ва экологик сиёсатни шакл­лантиришдаги ўз ўринлари ҳақида атрофлича маълумот олдилар.

Амалий натижалар

Фарғона форуми фақат назария ва муҳокамалар билан чекланмади. Унинг амалий якуни сифатида «Маҳаллани чиқиндидан ҳоли ҳудудга айлантирамиз» акцияси ўтказилди. Бундан ташқари, «Яшил макон» лойиҳаси доирасида университет ҳудудида 200 тупдан ортиқ дарахт экилиб янги экобоғ барпо этилди. Бу нафақат экологик ҳолатни яхшилаш, балки ёш авлодга табиатга ғамхўрлик қилиш маданиятини сингдиришга қаратилган узоқ муддатли сармоядир. Шунингдек, «Кўнгил экологияси» танлови ғолиблари ҳам тақдирланди.

Фарғонада ўтказилган бу тадбирлар мажмуаси Ўзбекистонда экологик ҳаракат ривожланаётганини ва бу жараёнда ёшлар асосий ҳаракатлантирувчи куч сифатида майдонга чиқаётганини яққол кўрсатди. Экология – бу келажак ва бу келажак пойдеворини ёшлар бугундан бошлаб қурмоқда.

ЎЭП Марказий Кенгаши

матбуот хизмати