Бугунги кунда Ўзбекистон барқарор ривожланиш мақсадларини амалга оширишда яшил иқтисодиёт тамойилларига асосланиб, атроф-муҳитни асрашга алоҳида эътибор қаратмоқда.

Шу муносабат билан Ўзбекистон Экологик партияси Навоий вилоят кенгаши, «Юксалиш» ҳаракати вилоят ҳудудий бўлинмаси ва ЎзННТМА Навоий вилоят ҳудудий бўлинмаси ҳамкорлигида «Ўзбекистон – 2030» стратегиясини «Атроф-муҳитни асраш ва яшил иқтисодиёт йили»да амалга оширишга оид давлат дастури лойиҳаси муҳокамасига бағишланган тадбир ташкил этилди.

Тадбирдан кўзланган мақсад, давлат дастурида белгиланган экологик вазифаларни кенг жамоатчиликка етказиш, атроф-муҳитни муҳофаза қилиш бўйича янги ташаббусларни илгари суриш ҳамда экологик муаммоларни ҳал қилишда биргаликдаги саъй-ҳаракатларни белгилаб олишга қаратилди. Тадбирда бир қатор давлат ва нодавлат ташкилотлар вакиллари, экология соҳаси мутахассислари, жамоатчилик фаоллари иштирок этди.

Давлат дастури ло­йиҳасида экотизимларни муҳофаза қилиш, табиий ресурсларни оқилона ишлатиш ҳамда ҳудудларда экологик хавфсизликни таъминлаш бўйича амалий чора-тадбирлар белгиланган. Иқтисодиётнинг экологик жиҳатдан барқарор тармоқларини ривожлантириш, муқобил энергия манбаларидан фойдаланишни кенгайтириш ва чиқиндиларни қайта ишлаш технологияларини жорий этиш масалалари қамраб олинган. Ҳар бир фуқаронинг экологик онгини ривожлантириш, ёшлар орасида экологик маданиятни тарғиб қилиш ва аҳолининг экологик масъулиятини ошириш бўйича ташаббуслар илгари сурилган. Ҳудудларда иқлим ўзгаришига мослашиш бў­йича тадбирлар режаси, шу жумладан, ўрмонзорларни кўпайтириш, сув ресурсларини бошқариш ва ерлар деградациясининг олдини олиш масалалари муҳим мавзу сифатида кун тартибига киритилган.

Муҳокамалар жараёнида қатнаш­чилар давлат дастури лойиҳасида белгиланган мақсад ва вазифаларни амалга оширишнинг аҳамиятини алоҳида таъкидлашди. Тадбир якунида бир қатор амалий таклифлар ишлаб чиқилди. Жумладан, ҳудудий экологик муаммоларни ҳал этиш учун маҳаллий ҳамкорликни кучайтириш, таълим муассасаларида экологик мавзудаги махсус дастурларни жорий этиш, яшил иқтисодиёт бўйича лойиҳаларни молиялаштириш имкониятларини ошириш бугунги кунда долзарб бўлиб турибди. Экологик инфратузилмани ривожлантириш бўйича давлат ва хусусий сектор ҳамкорлигини кенгайтириш ҳам муҳим ҳамиятга эга.

Табиатни муҳофаза қилиш ва яшил иқтисодиёт тамойилларини ривожлантириш бугунги куннинг долзарб масалаларидан бири ҳисоб­ланади. Ўзбекистоннинг 2030 йилгача бўлган стратегик режаларида экологияга оид қадамлар нафақат ҳозирги, балки келажак авлодлар учун ҳам соғлом ва барқарор ҳаёт шароитини яратишга қаратилган. Ушбу тадбир мазкур йўналишдаги саъй-ҳаракатларни бирлаштириш ва жамиятни эзгу мақсадга сафарбар қилишда муҳим қадам бўлди.

Алижон ЖЎРАЕВ,

ЎЭП Навоий вилоят кенгаши

раиси ўринбосари