Ҳар бир сиёсий партиянинг омма орасидаги ҳурмати, обрў-эътибори депутатлик корпусининг фаолияти билан чамбарчас боғлиқ. Айниқса, катта сиёсий жараён арафасида депутатларнинг ўтган муддатдаги фаолияти яна бир бор сарҳисоб қилиниб, тегишли хулосалар чиқарилиши табиий.

Ўзбекистон Экологик партияси Қашқадарё вилоят кенгаши раиси, Халқ депутатлари вилоят кенгаши депутати Носир ҲАЛИМОВ билан суҳбатимиз вилоятдаги депутатлик гуруҳларининг фаолияти хусусида бўлди.

—  Носиржон ака, сизнингча, бугун маҳаллий Кенгашлардаги депутатларимиз ўз вазифаларини қай даражада уддалаб келишмоқда? Халқ улардан розими?

—  Ўзбекистон Экологик партияси Қашқадарё вилоят, туман (шаҳар) Кенгашлари депутатлик гуруҳлари депутатлари ўз зиммаларидаги халқ ишончини оқлашдек масъулиятни англаган ҳолда хизмат қилиб келишяпти. Депутатлар ўз фаолиятида партиянинг дастурий вазифаларини амалга оширишда партия электорати ва аҳолининг кенг қатлами билан юзма-юз мулоқотлар ташкил этиш, фуқаролар муаммоларини ўрганиш, уларга ижобий ечим топишда фаоллик кўрсатишмоқда.
Аҳолидан келиб тушган мурожаатлар ҳамда партия лойиҳалари доирасида олиб борилган ўрганишлар давомида аниқланган муаммолар юзасидан Халқ депутатлари вилоят Кенгашидаги ЎЭП депутатлик гуруҳи томонидан тегишли ташкилотларга шу йилнинг биринчи ярмида жами 20 та депутатлик сўрови юборилган. Сўровларнинг 15 таси доимий комиссия йиғилишларида муҳокама қилинган, 5 таси вилоят Кенгаши сессияси кун тартибига киритилиб, сессия қарори қабул қилинган.
Туман ва шаҳарлардаги депутатлик гуруҳлари томонидан 123 та депутатлик сўрови юборилган ва сўровларнинг 89 таси доимий комиссия йиғилишларида муҳокама қилинган. Шундан 30 таси туман (шаҳар) Кенгашлари сессияси кун тартибига киритилиб қарор қабул қилинган. Менимча, мана шу айрим мисолларнинг ўзиёқ депутатларимиз халқ дарди билан яшаётгани, фаолият юритаётганини кўрсатса керак.

—  Тўғри. Лекин депутатлар жойларга чиқиб, аҳоли ҳолидан хабар олиб фуқароларнинг арз-додини ҳам тинглаяптими? Ёки фақат хоналарида ўтириб, ўзларига қилинган мурожаатларни ўрганиш билан машғулми?

—  Эҳтимол, бу саволга менинг жавоб беришим бироз нокамтарлик бўлар. Жойлардаги реал вазиятни аҳоли яхши билади. Мана сизга биргина мисол. Яқинда Қарши тумани «21-Ғубдин» сайлов округи ҳудудида жойлашган «Кўчкак», «Шойхўжа», «Тинчлик», «Гулистон», «Шодлик», «Узумзор» маҳаллаларида аҳоли билан юзма-юз мулоқотлар ташкил этилиб, депутатларимиз томонидан ижтимоий-иқтисодий муаммолар ўрганилди.
Депутатлар ҳар бир мурожаатга эътиборни қаратар экан, шубҳасиз, муаммоларга ўз вақтида ечим топилишига эришмоқда. Депутат сўровларидан ташқари оғзаки мурожаатлар бўйича ҳам бир қатор муаммолар ўз ечимини топмоқда. Жумладан, иш билан бандлик, чиқиндиларни ташиш, атроф-муҳит муҳофазаси, дарахтларнинг кесилиши, моддий ёрдам, ичимлик сув таъминоти, газ масаласи, электр энергиясидаги муаммолар бўйича аҳоли мурожаатлари қаноатлантирилди.
Ўрганишлар жараёнида маҳаллалар ҳудудидаги симёғочлар эскиргани сабабли электр энергиясида тез-тез узилишлар бўлиши, айрим трансформаторлар таъмирталаблиги ҳамда қуввати пастлиги аниқланди.                                           
Аҳолини қийнаётган ушбу муаммо юзасидан «Қашқадарё ҳудудий электр тармоқлари» акциядорлик жамияти бош директорига депутатлик сўрови юборилиб, камчиликлар бартараф этилди. Ҳудуд эҳтиёжидан келиб чиқиб, қўшимча трансформаторлар ўрнатилди ва эскириб, муддатини ўтаган симёғочлар янги бетон симёғочларга алмаштирилди.
«Кўчкак» маҳалласининг «Анжирзор» ва «Гулзор» кўчаларига 45 дона янги темир бетон симёғочлар ўрнатилди. Натижада, маҳалла ҳудудидаги 4000 нафар аҳоли хонадонида электр энергияси яхшиланди.
Буларнинг барчаси халқни рози қилиш, уларнинг турмуш шароитини яхшилаш, фаровонликни ошириш учун қилинаётган ишлардир.

—  Экопартия депутатлари қандай экологик муаммолар устида ишлаяпти? Қашқадарёда қайси экологик масалалар аҳолини қийнаб келмоқда?

—  Аввало, аҳоли учун тоза ичимлик сув масаласини тилга олишимиз керак. Сабаби, мурожаатларнинг аксари шу мавзуда бўляпти. Масалан, юқоридаги ўрганиш доирасида Қарши туманининг «Кўчкак» маҳалласи аҳолиси ичимлик сув таъминотидан қийналаётгани маълум бўлди. Бу масала бўйича «Қашқадарё сув таъминоти» масъулияти чекланган жамияти томонидан маҳалладаги «Янги ҳаёт», «Мустақиллик», «Серқуёш», «Табассум» кўчаларига 5000 метр масофага ичимлик сув қувури тортилиб, қурилиши лойиҳа асосида ниҳоясига етказилди. Лойиҳа доирасида 8000 нафарга яқин аҳоли хонадонига тоза ичимлик сув кириб борди.
Партиямизнинг туман (шаҳар) Кенгашларидаги депутатлик гуруҳлари томонидан амалий ишлар бажариляпти. Жумладан, Миришкор туман Кенгаши депутатлик гуруҳи аъзоларидан бири – «15-Янгиобод» сайлов округи депутати Ҳайдар Бобоев ташаббуси билан туман марказидан олисда жойлашган ҳудуд аҳолисининг ичимлик сувга бўлган эҳтиёжи қондирилди. Бунинг учун қиймати 4,5 миллиард сўмлик, 200 кубометр сув сиғимига эга бўлган сув иншооти барпо этилди. Натижада, маҳалланинг 1200 нафар аҳолиси тоза ичимлик сув билан таъминланди.
Экопартиянинг Қашқадарё вилоят Кенгаши депутатлик гуруҳи ҳамда Халқ депутатлари вилоят Кенгашидаги Аграр, сув хўжалиги масалалари ва экология бўйича доимий комиссия томонидан Чироқчи туманида долзарб экологик муаммоларни ўрганиш мақсадида жамоатчилик экологик назорат ишлари олиб борилди. Унда Чироқчи туманининг «Боғи шамол» ва «Ўзбекистон» маҳалла фуқаролар йиғини чегарасида жойлашган, туман марказий деҳқон бозори ёнидан ўтган «Қайирма» каналидан оқаётган оқова сув санитария-гигиена талабларига умуман жавоб бермаслиги, каналдан тарқалаётган бадбуй ҳиддан одамлар азият чекаётгани маълум бўлди. Чироқчи тумани ҳокимига аниқланган камчиликлар юзасидан депутат сўрови юборилди. Натижада, “Аму – Қашқадарё” ирригация тизимлари ҳавза бошқармасига қарашли туман ирригация ва мелиорация бўлими реконструкция ишлари олиб борди ва камчиликлар бартараф этилди.

– Халқ депутатлари Қашқадарё вилоят Кенгашидаги Экопартия депутатлик гуруҳининг сўнгги вақтлардаги энг катта ташаббуси сифатида қайси ишни кўрсата оласиз?

– Жорий йилда амалга оширилган йирик ишлардан бири – вилоят Кенгаши сессиясида Халқ депутатлари вилоят Кенгашидаги Ўзбекистон Экологик партияси депутатлик гуруҳи томонидан Қашқадарё вилоятида 2024 йил баҳор мавсумида «Яшил макон» умуммиллий лойиҳаси доирасида экилган кўчат ва дарахтлар парвариши ҳамда чиқиндиларни бошқаришни такомиллаштириш юзасидан вилоятда ўтказилган мониторинг натижалари бўйича долзарб масаланинг кўриб чиқилиши бўлди.
Унда вилоят Экология, атроф муҳитни муҳофаза қилиш ва иқлим ўзгариши бошқармаси ҳамда туман (шаҳар) ҳокимликлари томонидан экилган кўчатларни парвариш қилиш, суғориш, пайҳон қилинишининг олдини олиш ишлари етарли даражада амалга оширилмаётгани кўрсатиб ўтилди. Масъуллар огоҳлантирилиб, вилоят ҳокимининг тегишли ўринбосарлари, туман (шаҳар) ҳокимлари ва алоқадор ташкилотлар раҳбарлари зиммасига кўчатларни парваришлаш ва чиқиндилар масаласи бўйича аниқ вазифалар юкланди.

—   Мамлакатимизда сайловолди кампаниясига старт берилган. Бу муҳим сиёсий жараёнда Экопартиянинг ўрнини қандай кўрасиз?

—  Партиямизга халқнинг ишончи катта. Буни ўз хоҳиш-иродаси билан шу партия сафида бўлишни танлаётган олти юз мингдан ортиқ ватандошимиз мисолида кўриш мумкин. Партиямизнинг сайловда иштирок этиши учун имзо йиғиш жараёнида ҳам бизни кенг аҳоли қатлами қўллаб-қувватлашига гувоҳ бўлдик.
Ўзбекистон Экологик партиясининг сиёсий майдондаги мақсади  мамлакатда экологик барқарорликни таъминлаш ҳамда табиий ресурслардан самарали ва оқилона фойдаланиш, яшил иқтисодиётга ўтишни жадаллаштириш орқали аҳолимизнинг қулай атроф-муҳитга бўлган ҳуқуқларини рўёбга чиқариш, халқимиз ва келажак авлод учун муносиб турмуш шароитларини яратиш ҳамда фаровон жамиятни барпо этишдан иборатдир. Буни унутмаслик, партиянинг жамият ҳаётидаги мавқеини янада мустаҳкамлаш ва янги босқичга кўтариш ЎЭП депутатларининг виждон ишига айланиши керак. Шунда сайловлар биз учун муваффақиятли бўлади.

Сожида АКРАМОВА 
суҳбатлашди.