Инсон ва табиат. Уларнинг ҳар иккисида бир-бирига илҳом берадиган ажойиботлар талайгина. Яшил боғлар, пурвиқор тоғлар, майсага бурканган хиёбонлар киши қалбини завқу шавққа тўлдиргани каби инсонлар томонидан табиатга нисбатан қилинаётган шафқатсиз муносабат ҳам юракни чуқур қайғуга солади. 

Сўлим табиати билан ижод аҳлининг қалбига илҳом улашган «Воҳим» қишлоғи Фарғона вилоятининг Риштон туманида жойлашган. Табиатни севган, борлиққа бўлган жўшқин меҳри сабаб шеъру ашъор битадиган Асадуллоҳ Солиҳ айни шу манзилда таваллуд топган. 

Унинг ижодида табиат ва экология мавзулари ёрқин нур сочиб туради. Атрофимиздаги турфа олам ҳақида ўндан зиёд шеърлар яратган. Қувонарлиси, яхшидан боғ қолар нақлига амал қилган шоиримиз набираларининг табиатга ошно бўлишида ҳам бош-қош.
– Дарахтларнинг парвариши, жониворларга меҳр-шафқатли бўлиш, атроф-муҳит тозалиги ҳақида набираларимга ҳаётий мисоллар билан кўп насиҳат қиламан, – дей­ди биз билан суҳбатда Ўзбекистон Ёзувчилар уюшмаси аъзоси Асадуллоҳ Солиҳ.
Катта Фарғона каналига туташ жойда истиқомат қиладиган устазода ижодкор оқар сувнинг ифлосланиб бораётгани, чиқинди уюмлари тоғ бўлиб кўчаларнинг кўркини бузаётгани ва яна бир қанча экологик муаммолардан хавотирда. Курраи заминда мавжуд бўлган экологик муаммолар бугун мамлакатимизда ҳам тобора қулоч ёзаётгани, шу аснода тутун ва чангга тўлиб бораётган ҳавонинг инсон саломатлигига таъсири ҳақида жамоатчилик вакилларининг аксарият қисми лоқайд эканини куюнчаклик билан такрорлайди.
Дарҳақиқат, бугун маҳалла еттилиги ёшлар ҳаётининг ажралмас бўлагига айлангани сир эмас. Бунда нуронийларнинг ҳаётий тажрибасидан унумли фойдаланган ҳолда яшаш манзилларда яшиллик дунёсини бойитишга ҳисса қўшиш, шу сингари хайрли ва эзгу ташаббусга ёшларни ҳам жалб қилиш зарур. Ўзбекистон Экологик партияси фаоли Асадуллоҳ Солиҳ ижодига мансуб қуйидаги шеър ҳам олам ва одамни уйғунликда яшашга чорласа ажаб эмас.

Тоза ҳаво минг дардга даво,
Тутун, чангга тўлмасин ҳаво,
Солинг қулоқ, ва денглар «ховва»,
Табиатни асранг, одамлар!

Барча неъмат Тангридан инъом,
Этманг уни барбод, қатли ом,
Эзгуликда қолдиринг бир ном,
Табиатни асранг, одамлар!

Заҳру заққум ютмасин олам,
Дард чекмасин, десангиз болам,
Ҳаволарда қолмасин нолам:
Табиатни асранг, одамлар!

Эллар бўлсин доим соғ-омон,
Гуллаб-яшнаб, тинч бўлсин замон,
Ўзлигингиз этинг намоён,
Табиатни асранг, одамлар!

Бугун экинг фақат гул, дарахт,
Бойлик дебон бўлмангиз карахт,
Шу бугундан қилингиз сиз аҳд,
Табиатни асранг, одамлар!

Эй, инсонлар, бўлингиз огоҳ,
Яна эрта бўзлаб, тортманг оҳ,
Ташвиш ила дер, Асадуллоҳ:
Табиатни асранг, одамлар!
Шу Ватанни асранг, одамлар!

Гулрухсор ОМОНДИНОВА,
ЎЭП Фарғона вилоят партия ташкилоти
бош мутахассиси