Унинг бебаҳо маданий мероси учун депутатлар масъул бўла олишяптими?

Халқ депутатлари Бухоро вилоят Кенгаши депутатлари, вилоят маданий мерос бошқармаси, Давлат солиқ қўмитаси ҳузуридаги Кадастр агентлиги бошқармаси ва қатор мутасадди ташкилотлардан ташкил топган ишчи гуруҳ Бухоро тарихий маркази ва буфер зонаси, маданий архитектура ва археология мероси объектларини муҳофаза қилиш, уларни сақлаш ҳамда тарғиб қилиш бўйича амалга оширилаётган ишларни ўрганиб чиқди.

Ишчи гуруҳ томонидан маданий мерос объектлари кадастр ҳужжатларининг расмийлаштириш ҳолати, объектларга муҳофаза белгилари ўрнатилгани ва уларнинг сақланиши, таъмирлаш борасида амалга оширилаётган ишлар, уларнинг сифати кўздан кечирилди. Шунингдек, маданий мерос объектларини асрашга доир ишларни олиб бориш учун ажратилган маб­лағлар ва уларни ўзлаштириш ҳолати ўрганилди. Объектларда олиб борилаётган таъмирлаш ишларининг режа асосида бажарилиш аҳволи, реставрация ишларида қурилиш материаллари сарфи, уларни таъмирлаш учун жалб қилинган уста реставраторлар малакаси, қурилиш ташкилотлари тажрибаси мониторинг қилинди.

Шунингдек, ишчи гуруҳ таркибидаги профессор-ўқитувчилар томонидан маданий мерос объектларидан мақсадли фойдаланиш борасида амалга оширилаётган ишлар натижадорлиги, объектларнинг сақланиш ҳолатига таъсир қилаётган техноген ва салбий омиллар ўрганилди. Хулосалар умумлаштирилиб, натижаси таълим, соғлиқни сақлаш, маданият, спорт ва ижтимоий ҳимоя масалалари бўйича доимий коммиссия йиғилиши ҳамда вилоят Кенгаши сессиясида кўриб чиқилди.

Унда депутатлар ва тегишли ташкилотлар томонидан вилоятдаги маданий мерос объект­ларини ўрганиш ҳолати муҳокама қилинди. Сўзга чиққанлар вилоятдаги моддий маданий мерос объектларини аниқлаш, ҳисобга олиш, муҳофаза қилиш, реконструкция ва рес­таврация қилиш, тарғиб этиш, давлат реестри, электрон каталоги, паспорти ва давлат кадастрини юритиш ҳамда қўриқланадиган ҳудудларини белгилаш бўйича бир қанча ишлар амалга оширилганини таъкидлашди.

Тарихий шаҳар маркази, хусусан, ҳар бир обидани тиклашда Бухоро замонавий жўшқин ҳаёт кечираётган тирик организм эканини унутмаслик керак. Унда регенерация қилинаётган ҳар бир обидага тирик тўқима сифатида муносабат қилиб, унинг қайта тикланиш лойи­ҳаларида умумий қоида ва тамойил­лар билан чекланиб қолмасдан, индивидуал ёндашишни асосий тамойил деб қарасак, биз кеча ва бугун жаҳонга машҳур бўлган шариф шаҳар – Бухорони ер юзида яна кўп асрлар давомида яшашини таъминлаган бўламиз.

Садоқат СИДДИҚОВА,

ишчи гуруҳ раҳбари,

Экопартиядан Халқ депутатлари

вилоят Кенгаши депутати