«Яшил макон» умуммиллий лойиҳасининг кенг ривож топишида экин майдонларининг катта қисмида залворли меҳнат қилиб келаётган миришкор боғбон фермер хўжаликларининг ўз ўрни ва ҳиссаси бор.

Боғот туманининг драйвери узумчилик ҳисобланади. Туман бўйича узумчилик мактаби Деҳқонбозор қишлоғида яратилган. Ҳар йили ушбу ҳудуднинг ўзида 16 минг тонна атрофида тилёрар узумлар етиштирилади.

Бугунги кунда узумчилик мактаби аждодлардан авлодларга ўтиб давом этиб келмоқда. Узумчиликка ихтисослашган фермер хўжаликлари томонидан соҳадаги дунё тажрибалари қўллаб кўрилаётгани таҳсинга лойиқ. Ишчи гуруҳимиз аъзолари билан биргаликда Узумзор шаҳарчаси ҳудудида жойлашган узумзорларда қизғин олиб борилаётган ишларга гувоҳ бўлдик. Анъанани изчил давом эттириб келаётган тажрибали деҳқонлардан бири Маҳмуджон ака Содиқовга қарашли узумзорларда бўлганимизда  кўнглимиз тоғдек кўтарилди. Узумзорларнинг агротехник кўрсатмалар асосида меҳр билан парваришланаётгани кўзни қувонтирадиган узумлар ривожида ўз аксини топган.

– Она заминни яшнатаётган фермерлар ҳар томонлама қўллаб-қувватланаётгани кучимизга куч, ғайратимизга ғайрат қўшмоқда. Кўрсатилаётган ғамхўрликдан илҳом олиб узумчиликда юксак хирмон кўтаришни олдимизга мақсад қилиб қўйганмиз, – дейди биз билан суҳбатда Маҳмуджон ака Содиқов.

Узумзорлар атрофидаги сув йўллари қирғоқларига экилган турли хил аъло навли олма, ўрик, гилос, беҳи, шафтоли, нашвати ва бошқаларни кўриб кўзингиз қувонади. Буюкларга бешик бўлган боғлар юртининг биологик хилма-хиллигига муносиб ҳиссаларини қўшаётган деҳқонларимизга хирмонингизга барака, деб қоламиз!

Улуғбек ИБРОҲИМОВ,

ЎЭП Боғот туман
 кенгаши раиси,

Халқ депутатлари
туман кенгаши депутати