Бунга сабаб нима: ҳаво, сув ёки тупроқ?

Мамлакатимизнинг барча ҳудудларида шифобахш неъмат ҳисобланмиш анжир етиштирилади. Аммо Самарқанд туманидаги Боғибаланд маҳалласида етиштириладиган анжир фойдали микроунсурларга бойлиги, таъми ва сифати билан бошқалардан ажралиб туради. Бу — соҳа мутахассислари, хорижлик олимларнинг хулосаси.

— Анжир мевасида 40 фоизгача, қуритилганида эса 57-71 фоиз шакар бор, — дейди тиббиёт фанлари доктори Сайдулла РАСУЛОВ. — Шунингдек, оқсил, аскорбин кислота, каротин, кальций, магний, фосфор, темир, органик кислоталар, шовул кислота мавжуд. Бу мевадан тиббиётда шифобахш неъмат сифатида фойдаланиб келинади.

Юртимизнинг турли ҳудудларида етиштириладиган анжирлар таркиби ўрганилганда Боғибаланд анжири микроунсурларга бойлиги ва бошқа хусусиятлари билан ажралиб туриши аниқланган. Кўчати шу ердан олиб борилиб, бошқа ҳудудларда экилганида ҳам мева Боғибаланддагичалик хуштаъм бўлмаган.

— Боғимизда 200-300 йиллик анжир дарахтлари бор, — дейди Боғибаланд маҳалласида яшовчи 68 ёшли тажрибали боғбон Шарофиддин АСЛИЕВ. — Отам ота-боболаримиз эккан анжирларни парвариш қилишни ўргатган. Болалигимда ўзим эккан ниҳоллар ҳам бугун катта дарахт бўлиб, мўл ҳосил бермоқда. Анжирнинг томири қаримайди, новдалари янгиланиб турилса, тўғри ва сифатли ишлов берилса, йилдан-йилга гуркираб ўсиб, ҳосил бераверади. Бир неча йил олдин Исроилдан келган фермер ва олимлар боғимизда бўлди. «Ўзбекистоннинг бошқа ҳудудларида, чет мамлакатларда ҳам анжирларни татиб кўрдик. Лекин сизнинг боғингиздаги мева таъми ва бошқа хусусиятлари бизга кўпроқ манзур бўлди», деб ўз юртида экиш учун қаламча кесиб беришимни сўрашди. Бошқа жойда бу ердагичалик анжир етиштириш мушкул эканини билсам-да, меҳмонлар раъйини қайтармай, қаламча тайёрлаб бердим. Кейинроқ эшитишимча, ниҳолларнинг аксарияти кўкарган бўлса ҳам кутилганидек ҳосилга кирмабди.

Бугун Боғибаланддаги аҳоли хонадонларида ҳам анжир ғарқ пишган палла. Мева юртимизнинг барча ҳудудларига етказиб бериляпти. Маҳалладаги анжирзорларни томоша қилиш, мевасини татиб кўриш учун ҳатто, хорижлик сайёҳлар келмоқда.

Ғолиб ҲАСАНОВ,

ЎзА мухбири