Камбағалликни қисқартириш ва бандлик вазирлиги 20 гектар майдонда катта боғ яратмоқда

Иқлим ўзгариши дунёнинг барча давлатларини ташвишга солаётгани сир эмас. Ана шундай оғир бир вазиятда юртимизда амалга оширилаётган «Яшил макон» умуммиллий лойиҳаси халқаро миқёсда ҳам эътироф этилмоқда. Бу хайрли ишга барча бирдек, жумладан, мамлакатимиздаги ҳар бир вазирлик, идора ва ташкилотлар ҳисса қўшаётгани эътиборга моликдир.

Лойиҳа доирасида қаровсиз ва қўриқ ерлар, қир-адирларга турли мевали ва манзарали дарахт кўчатлари ўтқазилиб, янги боғларга асос солиняпти. Энг муҳими, экилаётган ҳар бир кўчатнинг ўниб-ўсиб кетиши учун масъуллар бириктириляпти, ҳар бир кўчат ҳисобга олиняпти.

Камбағалликни қисқартириш ва бандлик вазирлиги ҳам ушбу лойиҳадан четда қолгани йўқ. Лойиҳа доирасида Тошкент вилояти Бўстонлиқ туманининг тоғли ва тоғолди ҳудудларида вазирлик томонидан «Яшил боғлар» барпо этилмоқда.

– Вазирлигимизга бириктирилган 20 гектар ер майдонида баҳор ва куз мавсумида жами 10 минг дона турли дарахт кўчатларини экиш белгиланган, – дейди Камбағалликни қисқартириш ва бандлик вазирлиги Ҳоким ёрдамчиларининг фаолиятини мувофиқлаштириш бошқармаси бошлиғи Сардор РАХИМОВ. – Кўчат экиш режа қилинган ер майдони географик жойлашуви, иқлими, тупроқ унумдорлиги ўрмон хўжалиги илмий ходимлари томонидан ўрганилди. Мутахассислар тавсиясига кўра, ушбу тоғ олди лалмикор ерга экиш учун бодом кўчати танланди. Бугунги ҳашар ишларида 2 минг туп бодом кўчатлари экилди.

Ҳа, халқимизга хос бўлган қад­рият ва анъаналаримиздан бири, кўчат экиб боғ яратишдир. Чунки инсон ҳаёти ва саломатлигини сақлашда ҳамда атроф-муҳитни муҳофаза қилиб, экологик муаммоларни бартараф этишда экилаётган дарахтлар муҳим ўрин тутади. Дарахтлар биз нафас орқали чиқараётган зарарли карбонат ангидридни ютиб, ўзидан кислород чиқаради. Чанг-тўзонларни ушлаб қолиб, ҳавони тозалайди.

– Қулай жой танланиб, ҳудуд иқлим шароитига мос келадиган дарахт кўчатлари олиб келиниб, 2 минг туп бодом кўчатлари ўтқазилди, – дейди Камбағалликни қисқартириш ва бандлик вазирлиги Ахборот хизмати раҳбари Фахриддин ҲАЙИТОВ. – Бу ишда вазирликнинг барча ходимлари, маҳалла фаоллари, ёшлар иштирок этишмоқда. Энди ўтқазилган ушбу кўчатларни парвариш қилиш учун ҳудудга яқин жойлашган маҳаллалардаги ишсиз фуқаролар Жамоатчилик жамғармаси маблағлари ҳисобидан ҳақ тўланадиган мавсумий ишга олинади. Бу билан ҳудуддаги бир нечта ишсиз аҳолининг банд­лиги таъминланади ва улар оиласига қўшимча даромад олиб кириш имкониятига эга бўлишади.

«Она Ватанни боғу бўстонга айлантирамиз!» шиори остида ташкил этилган кўчат экиш тадбирида вазирлик жамоаси, тасарруфий ва ҳудудий тузилмалар ходимлари, Бўстонлиқ тумани маҳаллалари фаоллари ва ҳоким ёрдамчилари, оммавий ахборот воситалари ходимлари иштирок этди.

Шуни алоҳида таъкидлаб ўтиш керакки, «Яшил макон» умуммиллий лойиҳаси – бу бир кунлик ёки бир йиллик тадбир эмас. Яшаб турган жойимизни озода сақласак, она табиатни асрасак, яшилликка ўз ҳиссамизни қўшсак, биздан кейинги авлод ҳам бундай муҳитда муносиб камол топади. Табиатга меҳри уйғонади.

Мансурбек ЖАББОРОВ,

«Oila va TABIAT» мухбири