Қорақалпоғистон Республикасида экологик мувозанатни барқарор сақлашга ҳисса қўшувчи ҳар қандай лойиҳа қадрли саналади. Одамлар бундай лойиҳаларни нажот манбаи сифатида қабул қилишиб, жон-жаҳди билан қўллаб-қувватлаган ҳолда уни ҳаётга тадбиқ этишади.

Марказлардан олис овулларда жийда, юлғун ва саксовулларнинг қўр тўкиб турганини кўрсангиз, бу экологик мувозанатни сақлашга қаратилган лойиҳа ва тадбирлар натижаси эканини дарҳол ҳис қиласиз. Бундай манзараларнинг кўпайишига атроф-муҳит мусаффолиги ва соғлом умр кечиришнинг бош гарови саналган «Яшил макон» умуммиллий лойиҳаси доирасида янада кўпроқ ҳисса қўшилмоқда.

Жорий йил куз мавсумида Амударё туманида лойиҳа доирасида кўчат экиш ишлари қизғин давом этаётгани эътирофга муносиб. Барча овул ва маҳаллаларда, корхона-ташкилотлар, таълим муассасалари бинолари атрофида яшил боғ барпо этиш учун турли мевали ва манзарали дарахтлар кўчатларини ўтқазиш, уларни мунтазам равишда парваришлаш ишларига алоҳида эътибор қаратилмоқда.

– Ҳар йили мамлакатимизда минглаб, миллионлаб кўчат экилгани ҳақида ахборотларни эшитиб қоламиз. Бироқ экилган кўчатлар ўз вақтида парваришланмас экан, бари бефойда бўлиб қолаверади. Шу сабабдан ҳам биз туманимизда кўчатларни қандай ерга экилиб, парваришланаётганини доимий равишда назорат қилиб бориш вазифасини ўз зиммамизга олганмиз. Бунинг учун кўнгилли табиатсеварлардан иборат жамоатчилик кенгашлари қизғин фаолият олиб бормоқда, – дейди Халқ депутатлари Амударё тумани Кенгаши депутати, Ўзбекистон Экологик партияси аъзоси Баҳром Қодиров.

– Кўчат экиш дегани – қаламчани ерга тиқиб кетавериш дегани эмас, – дея суҳбатга қўшилади ЎЭП аъзоси Рашид Абдуллаев. – Бунинг ўзига хос нозик жиҳатлари бор. Шу сабаб ҳам дастлаб биз Қипчоқ овулидаги 1-сон касб-ҳунар коллежида кенг жамоатчилик учун семенар-тренинг ташкил қилдик ва кузги кўчат экиш ишларида нималарга аҳамият қаратиш зарурлигини тушунтирдик. Бунда тажрибали боғбон ва экологлар зарур маслаҳат ва кўрсатмалар бергани айни муддао бўлди.

Дарҳақиқат, кузги кўчат экиш ишлари баҳордагига қараганда муҳим саналади. Куз фаслида экилган ниҳол баҳоргача қувватга кириб, томир отиб кетишига муҳим шароит туғилади. Буни чуқур англаб етган лойиҳа иштирокчилари магистрал йўллар бўйларига иқлим шароитига мос дарахтлар экишмоқда. Эътибор бериб қаралса, марказларга элтувчи йўллар атрофи бийдай дашт эканига гувоҳ бўласиз. «Яшил макон» умуммиллий лойиҳаси доирасида бундай йўллар четига қурғоқчиликка чидамли даштбоп кўчатлар экишга ҳам эътибор қаратилаётгани айни муддао бўлмоқда.

Ишонамизки, «Яшил макон» ўта самарали лойиҳалардан бири бўлиб қолади. Яна ўн йиллардан сўнг мамлакатимиз сўлим дарахтзорлар ўлкасига айланади. Бунда эса ушбу лойиҳанинг ўрни ва аҳамияти катта бўлади.

Саъдулла СОДИҚОВ,

ЎЭП Амударё туман

кенгаши раиси,

халқ депутатлари туман

Кенгаши депутати