Куни кеча Ўзбекистон Республикасининг сайланган Президенти ўз лавозимига киришишига бағишланган тантанали маросимда мамлакатимиз ривожланишига хизмат қиладиган устувор вазифалар белгилаб берилди, муҳим ташаббуслар илгари сурилди.

Давлатимиз раҳбари келгуси етти йилга мўлжалланган стратегик мақсадларни кўрсатиб ўтди. Булар – қонунчилик ва ижро ҳокимиятини такомиллаштириш, ихчам ва самарали бошқарув тизимини ташкил этиш, ижтимоий соҳа ва хизматларни ривож­лантириш, тадбиркорлик учун имкониятларни кенгайтириш, иш ўринлари ва аҳоли даромадларини кўпайтириш кабилардир.

Дунёдаги зиддиятлар иқтисодиёт учун муаммолар келтириб чиқармоқда. Иқлим ўзгариши, табиий бойликлар ва сув ресурсларининг тобора тақчил бўлиб бораётгани ҳам барқарор ривож­ланишга салбий таъсир кўрсатмоқда. Мана шундай оғир ва таҳликали вазиятда халқимиз манфаатларига жавоб берадиган ягона тўғри йўлни – самарали ички ва ташқи сиёсат йўлини аниқ белгилаб олиш ва уни қатъий амалга ошириш лозимлиги қайд этилди.

Таъкидлаш жоиз, Янги Ўзбекистонда олиб борилаётган ислоҳотлар ҳақида гапирганда, атроф муҳитни, ўсимлик ва ҳайвонот дунёсини муҳофаза қилиш ҳамда улардан оқилона фойдаланиш бўйича бўлаётган ўзгаришларга ҳам алоҳида тўхталиш жоиз. Чунки охирги йилларда айни йўналишда улкан ишлар қилинди.

Жумладан, биргина 2022 йил давомида хавфлилик даражаси юқори ва ўрта бўлган металлургия, ёғ-мой, энергетика ва қурилиш материалларини ишлаб чиқарувчи 28 та йирик корхоналарда самарадорлиги 95 фоиздан кам бўлмаган 150 та чанг-газ тозалаш ускуналари модернизация қилинди. Бу орқали эса атмосферага 2,2 минг тонна чиқинди газларининг камайишига эришилди.

Бундан ташқари, 43 та атмосферага ташламалар ташловчи корхоналарда 307 та чанг-газ тозалаш ускуналари модернизация қилиниб, атмосфера ҳавосига таъсир хавфи юқори бўлган 44 та саноат корхоналарининг ифлослантириш манбаларида намуналар олиш ва таҳлил қилиш бўйича 69 та автомат станциялари, уларга туташ ҳудудларда жами 27 та стационар кузатиш пункт­лари ўрнатилиб, ягона геоахборот маълумотлар базасига тест режимида интеграция қилинди.

Шунингдек, кейинги йилларда Оролбўйида олиб борилаётган чора-тадбирлар юзасидаги барча миллий ташаб­буслар жаҳон ҳамжамияти томонидан кенг қўллаб-қувватланмоқда. Жумладан, халқаро миқёсда олиб борилган конструктив саъй-ҳаракатлар натижасида БМТнинг Оролбўйи минтақаси учун Инсон хавфсизлиги бўйича кўп томонлама шериклик асосида траст фонди ташкил этилди. Оролбўйи минтақасини экологик инновация ва технологиялар ҳудуди, деб эълон қилиш бўйича БМТнинг махсус резолюцияси қабул қилинди.

Оролбўйи минтақасини экологик инновация ва технологиялар ҳудуди, деб эълон қилиниши ўз навбатида, Орол денгизи қуриган тубида шўрланган ерларда экотизим ва барқарор турмуш даражасини таъминлаш, халқаро ташкилотлар билан инновация ва ерларнинг шўрланган ҳудудда экологик муаммоларни ҳал қилиш бўйича ҳамкорликни ташкил этиш, тажриба учун экспериментал майдонларни яратиш имконини беради.

Янги Ўзбекистоннинг Тараққиёт стратегиясида ҳам Орол денгизи тубида қўшимча 500 минг гектар яшил майдон барпо этиб, унинг умумий ҳажмини 2,5 миллион гектарга етказиш вазифаси қўйилган. Бу ўз навбатида, Оролбўйи ҳудудида ўтган асрнинг иккинчи ярмидан бошланган экологик фожиа таъсирини камайтириш, одамлар ҳаётини яхшилаш ва уларнинг орзу-ниятлари амалга ошишига хизмат қилади.

Бир сўз билан айтганда, Ватанимизнинг равнақи ва ёрқин келажаги учун бир ёқадан бош чиқариб, биртану бир жон бўлиб, буюк мақсадларимиз йўлида фидокорона хизмат қилсак, албатта, кўзлаган марраларимизга эришамиз.

Наврўзбек ЮСУПОВ,

Олий Мажлис Қонунчилик

палатаси депутати,

Ўзбекистон Экологик партияси фракцияси аъзоси