Тўқсонинчи йилларнинг охиригача мамлакатимизнинг кўп ҳудудларида газ тақчил бўлиб, қувурлар кесиб сотиб юборилди. Ўша қувурларни кесиб сотиб, бола-чақасига едирганлар ҳозир орамизда тирик юришибди.

Оддий аҳоли қишда ўтин учун йўл бўйидаги дарахтларни кесиб ёқишди. Ҳозиргача кесиш давом этмоқда. Дарахт экишга эса ҳеч ким журъат қилмади.

Яхши билганим, Жиззах ва Сирдарё вилояти чўл ва дашт зонасидаги йўл бўйларидаги қалин дархтзорлар буткул кесиб ўтин қилинди. Ўрнига бир туп ҳам кўчат қадалмади.

Ҳатто электр симларини ҳам кесиб, рангли металга сотишди.

Ўзимизни одамлар, ҳамқишлоқ, қўшнилар шу ишни қилишди. Бегона эмас.

Дарахт экишни давлат амалга оширар экан, экологик маданияти бўлмаган халқ уни ҳам ўстирмайди. Тагига ёзда бир коса сув қуймаяпти.

Тез ўсиб, бир-икки йилда буталса ўтин бўладиган дарахтлар экилмас экан, йилдан-йилга беш баттар бўлаверамиз. Бу кунинг ҳали ҳолва дегим келаверади...

Давлатни ҳар йили миллионлаб доллар кўчатга пул ажратишини ғийбат қиламизу, дарвозамиз ташқарисига экиб кетилган кўчатга сув қуймаймиз. Нега?..

Ким эккан бўлса, ўша суғорсинми?

У ҳолда сенинг нафас олишга қандай хаққинг бор? Кислородни сенга ишлаб чиқараётган шу дарахт эдику!..

Хайрулло ҚИЛИЧЕВ