«Меҳнатнинг таги роҳат» деган гап ота-боболаримиз томонидан роса топиб айтилган. Мўжаз томорқасида меҳнат қилиб, муносиб даромад олаётган, рўзғорини бутлаб, шунинг ортидан фарзандларини ўқитаётган, шинам уй-жойлар қураётган ҳамюртларимиз ҳам бунга яққол намунадир.

Табиат чиндан ҳам меҳрибон, ер эса уйимиз, у бизни боқади, бошпана беради. Ана шу ерга меҳр билан ишлов берганлар, чин маънода тилини топганлар эса 3-4 сотих майдондан ҳам миллионлаб фойда кўради.

Қашқадарё вилояти Яккабоғ тумани «Бунёдкор» МФЙ Туркистон кўчаси 65-уйда яшовчи Неъмат Қораев бугун бу борада маҳалла аҳлига намуна бўлаётган миришкорлардан. Неъмат ака атиги уч сотихли томорқаси тупроғини олтинга айлантирмоқда. Ҳовлисининг ҳар қарич еридан унумли фойдаланиб, кичик яшил боққа айлантирган. Томорқасида мевали ва манзарали дарахтлар дейсизми, сабзавотлар дейсизми – хуллас барчаси бисёр. Томорқадаги 12 туп токка берилган ишлов натижасида ҳар йили 500-600 кг. ҳосил беради.

Кўпчилик 3-4 сотих жойни писанд қилмайди, нимага ҳам ярарди дейди. Аслида ҳақиқий меҳнатсеварлар учун бир қарич ер ҳам бебаҳодир. Қораевлар хонадони бугун шунга амал қилиб келмоқда. Уч туп хурмо дарахтидан йилига 500 килограмм, 9 туп анордан ҳам қарийб шунча мева олади. Оиладан ортгани албатта, бозор расталарини безаб, қўшимча даромад манбаига айланади.

Тиниб-тинчимас Неъмат ака бугун 1,5 сотих ерга 10 кг. уруғлик картошка экиб 150 кг. ҳосил олишни йўлга қўйган. Қўшимчасига хонадонида зотдор 20 та товуқ боқади ва паррандалардан кунига 12-15 дона тухум олади. Бу ҳовлига кирган инсон табиат гўзаллиги, яшилликдан баҳра олади. Боиси ҳовлидаги манзарали япон сакураси ва қийғос очилган атиргуллар киши кўзини қувнатиб, дилга ҳузур беради. Қизиғи, сув захираси сақланадиган ҳовуз ва қадимий қудуқнинг борлиги бу хонадон аҳли аждодлари ҳам азалдан меҳнаткаш бўлганининг белгисидир.

ЎЭП Қашқадарё вилоят партия ташкилоти