Лимончилик кенг ривожланиб, аҳоли даромадининг яна бир манбаига айланиб бормоқда. Кўп меҳнат талаб қилмайдиган лимон бугун кўпчиликнинг томорқасидаги мўъжаз иссиқхоналардан жой эгаллаб, яхшигина ҳосил бермоқда.

Йирик иссиқхоналарда эса лимонзорлар ташкил этилиб, маҳсулот хориж бозорларларига экспорт ҳам қилинмоқда. Жорий йилнинг дастлабки икки ойида 6 та хорижий давлатга 1,2 минг тонна лимон экспорт қилингани сўзимизнинг исботи.

Бугун вилоятларда ана шундай экспортбоп лимон етиштириш бўйича кенг кўламли ишлар амалга оширилмоқда. Хусусан, Наманган вилояти Поп туманида жойлашган 81 гектарлик иссиқхонада ҳам сархил лимонлар етиштириш, ҳар гектаридан 30 тоннадан ҳосил олиш кўзда тутилган.

Иссиқхона комплексидаги 81 гектар ер майдони 50 нафар тадбиркорларга 1 гектардан ҳамда 29 нафар тадбиркорга 0,20 гектардан тақсимлаб берилган. Жами 62 нафар тадбиркорларга 3,9 миллион АҚШ доллар миқдорида банкдан кредит ажратиб берилган. Тадбиркорлар ўзига тегишли бўлган ернинг ҳар қаричидан унумли фойдаланаётгани даромадини оширишга интилаётганидан, шу билан биргаликда катта мақсадлар сари одимлаётганидан далолатдир.

Ҳисоб-китобларга кўра, 1 гектар майдонда 30 тоннагача лимон етиштириш мумкин. 81 гектарлик лимонзор эса туманнинг экспорт салоҳиятини янада ошириб, 4 млн. АҚШ долларга ортишига хизмат қилади. Энг асосийси, ушбу лойиҳа доирасида 350 та доимий, 500 та мавсумий бўш иш ўринлари яратилади ва маҳаллий аҳолининг бандлиги таъминланади.