– Ассалому алайкум! Райгаз эшитади, оператор Фалончиева.

– Ассалому алайкум. Мен автомобиль заводи директорининг помошниги бўламан.

– Эшитаман. Хизмат?

– Биз райгазга пул ўтказган эдик. Лекин негадир газ келгани йўқ.

– Фирмангизнинг ҳисоб рақамини айтиб юборсангиз.

– Йўқ, мен фирмани айтмаяпман. Директоримизнинг уйларига тўлов қилдик.

– Кечирасиз. Жисмоний шахс, частни мулк эгасининг ўзи билан гаплашишимиз керак.

– Пул ўтказдик-ку, нима фарқи бор?

– Сиз у кишининг оила аъзосимисиз ёки бирга яшайсизми? Проспискангиз ўша хонадондами?

– Йўқ.

 – Унда гўшакни раисингизга беринг.

– Қизиқ экансиз-ку. Раис эмас, директор. У кишининг вақтлари йўқ бунақа нарсаларни суриштиришга. Мен билан гаплашаверинг.

– Сизнинг шахсингиз аниқ эмас. Идорамизга паспортингиз ва ишонч қоғози билан келсангиз, аниқлаштирамиз.

– Шунча оворагарчилик шартми? Компьютерингиздан шундоқ қараб юборсангиз бўлади-ку.

– Товламачи ва фирибгарлик ҳолатларининг олдини олиш мақсадида аввал шахсни тасдиқловчи ҳужжатни кўрсатишингиз керак ёки гўшакни раисингизга беринг.

– Ё тавба! (Гўшакни кафти билан ёпиб) Мунча бюрократ бўлмаса булар... (Бошқа телефонга ўтади) Фалончи Пистончиевич! Минг бор узр. Булар жуда эзма экан, «ўзлари билан гаплашамиз», дейишяпти. Хўп, хўп. Улаяпман. (Нариги гўшакка)

– (Ижирғаниш билан) Ҳа?

– Нима «ҳа»?

– Нима дейсиз? Нима гапингиз бор менда?

– Менда сизга ҳеч қанақа гап йўқ.

– Унда нега сўрадингиз?

– Ёрдамчингиз телефон қилибди.

– Хўп, телефон қилган бўлса, шартта газни ёқиб бермайсизми? Нега менинг вақтимни оласиз?

– Кечирасиз-у, у сизнинг уйингиз учун жавобгар эмас. Фирмангиз номидан гапирса, бошқа гап.

– Хўп, мана, менинг ўзим билан гаплашяпсиз, энди газни ёқинг.

– Тўловни қачон амалга оширдингиз.

– Кеча.

– Унда 59 кундан кейин ёқамиз.

– Нега энди?

– Тўлов қабул қилинганидан кейин икки ой муддатда ёқилади.

– Нега энди?

– Билмадим. Бизда шунақа топшириқ бор.

– Ким бунақа топшириқ берган? Бошлиғингизга уланг мени!

– Бошлиғимиз ҳозир йўқлар.

– Ўринбосари йўқми?

– Йўқ. Ҳеч ким йўқ.

– Яна ким билан гаплашсам бўлади?

– Фақат мен билан гаплашасиз.

– Сиз ҳал қилолмас экансиз-ку.

– Нега энди! Мен ҳал қиламан. Газингиз икки ойда ёқилади. Келаси ойга бир ҳафта қолибди. Ҳозирдан предоплата қилиб қўйсангиз, икки ой ичида нарх ўзгарса, фарқини тўлаб юрмайсиз. Қанча предоплата қиласиз?

– Одамнинг пулини олиб икки ой куттирасизларми? Ҳали ёқмаган газимга нархни ошириб, яна қарз ҳам қилиб қўясизларми?

– У ёғини мен билмайман. Бизда топшириқ шунақа.

– Уф... Бошлиғингиз қачон келади?

– Билмайман. Улар ҳозир прокуратурада кўрсатма беряптилар...

Мулоқотни оққа кўчирувчи ЖУЛҚУНБОЙнинг жияни