Мамлакатимизда атроф муҳитни муҳофаза қилиш, табиий ресурслардан оқилона фойдаланиш, айниқса, аҳолининг экологик маданиятини шакллантириш, атроф муҳитни муҳофаза қилиш соҳасида давлат органлари фаолиятининг шаффофлик даражасини ошириш ва фуқаролик жамиятининг ролини кучайтириш бўйича тизимли ислоҳотлар амалга оширилмоқда. Бунда Бош қомусимиз – Ўзбекистон Республикаси Конституцияси мустаҳкам ҳуқуқий асос бўлиб хизмат қилмоқда.

Олий Мажлис Қонунчилик палатасидаги Ўзбекистон Экологик партияси фракцияси ҳамда Экология ва атроф муҳитни муҳофаза қилиш масалалари қўмитаси ҳамкорлигида Ўзбекистон Респуб­ликаси Конституцияси қабул қилинганининг 29 йиллиги муносабати билан ўтказилган «Конституция – мамлакатимиз экологик ҳавфсизлигини таъминлашнинг ишончли кафолати» мавзуидаги давра суҳбатида шулар хусусида сўз борди.

Унда депутатлар, Ўзбекистон Республикаси Олий Мажлиси ҳузуридаги Қонунчилик муаммолари ва парламент тадқиқотлари институти ходимлари ҳамда оммавий ахборот воситалари вакиллари иштирок этди.

Олий Мажлис Қонунчилик палатаси Спикери ўринбосари, Экологик партия фракцияси раҳбари Хайрулло Ғаффоров ва бошқалар мамлакатимиз Конституциясида табиат ва жамият тизимидаги ўзаро муносабатларни тартибга солувчи махсус нормалар белгилангани, улар экологик ҳуқуқий муносабатлар пойдеворини ташкил этишини таъкидладилар. Асосий қонунимизнинг ҳар бир моддаси дастуриламал экани, ҳаётимиз қоидасига айланиши зарурлиги қайд этилди.

Бош қомусимизнинг 50-моддасида «Фуқаролар атроф табиий муҳитга эҳтиёткорона муносабатда бўлишга мажбурдирлар», деб белгилаб қўйилган. Бу фуқароларнинг экологик мажбуриятлари Конституция даражасида мустаҳкамланганини англатади.

Тадбирда сўз олганлар Конс­титуциямизнинг яратилиш тарихи ва шу кунга қадар унга киритилган ўзгаришлар ҳақида тўхталиб ўтдилар. Миллий ва умуминсоний ғояларни ўзида мужассам этган, халқимизнинг барча қатламларининг манфаатларини ифодаловчи Ўзбекистон Республикаси Конституцияси Ватанимиз тараққиётида янги бир даврни бошлаб берганини ҳамда амалга оширилаётган экологик ислоҳотларнинг асоси бўлиб хизмат қилаётганини таъкидладилар.

Асосий қонунимизда белгилаб берилган нормаларнинг ҳаётга кенг кўламда жорий этилиши атроф муҳит муҳофазаси, табиий ресурслардан оқилона фойдаланиш, юртимизда экологик ҳолатни соғломлаштириш нафақат давлат ва жамият, шу билан бирга, ҳар бир фуқаронинг вазифаси бўлишига эришишда муҳим аҳамият касб этиши қайд этилди.