Ҳар сафар Тошкентдан водий томонга кетишда Оҳангарон йўлининг икки четига экилган кўчатларни кузатаман.

Улардан баъзилари қуруқ ёки шамол синдириб учириб юборган ҳолда кўзга ташланса, айримлари соя бериб, йўл бўйида ҳаракат қилаётганларга салқинлик бахш этади. Шу манзараларни кўрганда қалбимда шундай орзу пайдо бўлди: «Қачондир шу йўлга мен ҳам бир туп кўчат экаман».

Ўтган шанба куни ана шу орзум амалга ошди. Ўзбекистон Экологик партияси Марказий Кенгаши аъзолари ҳамда партиянинг Тошкент вилояти масъуллари билан биргаликда кўчатлар экдик. Олий Мажлис Қонунчилик палатасидаги партиямиз фракцияси раҳбари Абдушукур Ҳамзаев бошчилигида минглаб кўчатларни яхши ниятлар билан ерга қададик.

Тажрибали агроном ва олим А.Ҳамзаев кўчатлар йўл бўйига экилишининг фойдалари, автомобиллардан ажралиб чиқадиган заҳарли газ ва чангларни ютувчи навлар тўғрисида атрофлича маълумотлар берди. Дарахт экиш келажак учун қилинаётган муҳим эзгу иш эканини таъкидлади. Энг асосий жиҳатларидан бири шуки, экилган кўчатларни суғориш узвийлигини таъминлаш мақсадида томчилатиб суғориш учун майдонга махсус сув тармоғи ўрнатилди. Яқин орада қувурлар ҳам тортилиши режа қилинган.

Ҳашарда бир ёши улуғ бобо набираси билан кўчат экаётганини кўрдим. Болалигимда бобом билан дарахт эккан кунларим кўз олдимга келди. Гўёки бу манзара ҳамжиҳатлик, ижтимоий масъулият ва нафосатнинг рамзига айлангандек.

Янги кўчатлар катта йўл ёқасига янгича манзара бахш этди. Бу ҳашар фақат кўчат экиш билан чекланмай, ҳамжиҳатлик ва табиатга садоқат рамзига айланди. Йўл бўйига хушманзара берувчи янги дарахт­лар умид ва хурсандлик ҳиссини уйғотди.

Камолиддин РЎЗИМАТОВ