Нарзулло Наимович Обломуродов

Биз келажак учун жавобгармиз!

Нарзулло Обломуродовнинг таржимаи ҳоли

Нарзулло Наимович Обломуродов 1975 йилда Самарқанд вилоятининг Ургут туманида туғилган. Миллати – ўзбек, маълумоти – олий. 1996 йилда Жаҳон иқтисодиёти ва дипломатия университетини, 2000 йилда Бирмингем университетини (Буюк Британия) тамомлаган, мутахассислиги бўйича иқтисодчи. Иқтисод фанлари номзоди, доцент.

Н.Обломуродов илк меҳнат фаолиятини 1996 йилда «Deloitte and Touche» халқаро аудиторлик ташкилотида бошлаган, кейин Ташқи иқтисодий фаолият миллий банкида фаолиятини давом эттирган.

2001-2008 йилларда Марказий банк ҳузуридаги илмий-тадқиқот марказида, Банклар Ассоциацияси ҳамда Республика фонд биржасида масъул лавозимларда ишлаган.

2008-2017 йилларда Тошкент тўқимачилик ва енгил саноат институти, Тошкент молия институтида кафедра мудири, факультет декани лавозимларида фаолият юритган.

Н.Обломуродов Япония, Европа Иттифоқи  ва бошқа ривожланган мамлакатларнинг етакчи олий таълим ва илмий марказларида малака оширган, БМТ Тараққиёт дастурининг халқаро илмий-техник лойиҳаларига раҳбарлик қилган. Илмий соҳада 30 дан ортиқ методик ишлар ҳамда қатор ўқув-услубий қўлланмалар муаллифидир.

Таълим соҳасидаги фаолияти давомида унинг  раҳбарлигида 2 та халқаро ва 3 та республика миқёсидаги илмий-амалий конференциялар ташкил этилган.

2017-2020 йилларда Ўзбекистон Республикаси Президенти Администрациясида масъул лавозимларда ишлаган. Жумладан, Ўзбекистон Респуб­ликаси Президенти Администрацияси Халқ қабулхоналари фаолиятини назорат қилиш ва мувофиқлаштириш шўъбаси мудири сифатида ҳудудларда аҳоли муаммолари билан ишлаш, ижтимоий аҳамиятга эга бўлган муаммоларни аниқлаш ва уларни бартараф этишда самарали фаолият олиб борган.

Нарзулло Обломуродов «Обод қишлоқ» дастури доирасида «Манас» қишлоғи, Мирзачўл тумани Гагарин шаҳри, Пахтакор тумани ҳамда бошқа ҳудудларни обод қилишда фаоллик кўрсатган. Мирзачўл тажрибаси асосида Жиззах вилоятининг шаҳар ва туман марказларининг янги архитектура қиёфасини яратиш, ҳудудларни ободонлаштириш, ичимлик сув ва канализация тармоқларини модернизация қилиш, ижтимоий соҳа объектларини таъмирлаш, янги иш ўринлари яратиш ишларида бевосита бош-қош бўлган.

2020-2021 йилларда Ўзбекистон Экология ва атроф-муҳитни муҳофаза қилиш давлат қўмитаси раисининг биринчи ўринбосари сифатида долзарб экологик муаммоларни ҳал этишда иштирок этган.

Н.Обломуродов 2021 йил 1 февралдан бошлаб Ўзбекистон Экологик партияси Марказий Кенгаши Ижроия қўмитаси раиси лавозимида фаолият олиб бормоқда.

Экологик муаммолар ечими билан боғлиқ қатор янги ташаббусларни амалга оширмоқда. Оролбўйи ҳудуди муаммолари ечимига қаратилган «Мўйноққа мадад» хайрия веломарафони, «Дарахт экинг» акцияси, экологик инновациялар ва яшил технологиялар танлови каби йирик ло­йиҳаларнинг муаллифидир.

Н.Обломуродов 2019 йилда «Содиқ хизматлари учун» медали билан тақдирланган.

Оилали. Уч нафар фарзанднинг отаси. Рафиқаси Ф.Раҳматова – Тошкент тиббиёт академияси докторанти.