Керакли масалликлар. Хамир учун: 200 миллилитр сут, 2 чойқошиқ шакар, 5 грамм қуруқ хамиртуруш, 1 чойқошиқ туз, 50 грамм маргарин, 350 грамм ун. 
Асоси учун: 300 грамм мол гўштидан қийма, 100 грамм пиёз, 100 грамм булғор қалампири, 1 ошқошиқ помидор пастаси, 2 та саримсоқ тишчаси, 100 грамм пиш­лоқ, 0,5 боғ шивит ва кашнич, 30 миллилитр ўсимлик ёғи, таъбга кўра туз ва мурч, устига суртиш учун тухум.

Хамир тайёрлаймиз: Илиқ сутга туз, шакар ва хамиртуруш солиб, аралаштирамиз. Эритилган маргарин солиб, яна аралаштирамиз. Ун солиб, юмшоқ хамир қорамиз. Хамирни 1 соатга иссиқ жойга олиб қўямиз.
Асосини тайёрлаймиз: Пиёзни майда тўртбурчак шаклида тўғраб, ўсимлик ёғида шаффоф тусга киргунича қовурамиз. Қийма солиб, ўртача оловда 4-5 дақиқа қовурамиз. Тўртбурчак шаклида тўғралган булғор қалампири, помидор пастаси ва саримсоқни солиб, аралаштирамиз ва 2-3 дақиқа қовурамиз. Туз ва мурч сепамиз. Охирида майдаланган кўкатларни солиб, аралаштирамиз ва оловдан олиб, озроқ совутамиз. Хамирни иккига бўлиб, ҳар бирини 3 мм. қалинликда ёямиз. Хамир ёнларини ичига қаратиб, озроқ ўраб, қайиқча ҳосил қиламиз. Қа­йиқчани зарқоғоз билан қопланган газ печи патнисига жойлаштирамиз.
Хамир устига қиймани солиб, устидан қирғичдан ўтказилган пишлоқни сепамиз. Ёнларига кўпиртирилган тухум суртамиз ва 190 даражада қиздирилган газ печига 20-25 дақиқага қўямиз.
Ёқимли иштаҳа!