Бу таомнинг афзал томони нимада дейсизми? Бу таомни бир неча хил усулда тайёрласа бўлади, масалан, картошка ўрнига гуруч ёки маржумак солиб, умуман янгича таъмга эга таом тайёрлаш имкониятига эга бўласиз.

Керакли масаллиқлар: 500 грамм мол гўшти, 600 грамм картошка, 3 дона бодринг, 1 дона пиёз, 2 дона помидор, 2 та саримсоқ, 1 ошқошиқ помидор пастаси, 1 ошқошиқ ун, ярим боғ кашнич, таъбга қараб туз, 1 чой қошиқ қуритилган қалампир, таъбга қараб қора мурч, янчилган аччиқ қалампир, қовуриш учун ўсимлик ёғи.

Мол гўштидан тайёрланадиган бу таом мазали ва жуда тўйимли бўлиб, бирозгина нордонроқ таъмга ҳам эгадир. Айниқса бу таом эркакларга жуда ҳам ёқади.

Тайёрланиши: Гўштни узунлиги 5 см, қалинлиги 1 см қилиб сомонча шаклида тўғраб оламиз. Товага икки ош қошиқ ўсимлик ёғи соламиз ва қиздирамиз. Гўштни ўртача оловда қизартириб қовурамиз. Устидан гўштни қоплагунича қайноқ сув соламиз. Това қопқоғини ёпиб, гўшт юмшагунича димлаб қўямиз.

Гўшт пишгандан сўнг, қолган суви буғланиб кетиши учун, това қопқоғини очиб оловни баландлатамиз. Сўнг тўғралган пиёз ва унни соламиз ва аралаштирамиз.

Пиёз юмшагунича қовурамиз. Помидорларни пўстидан тозалаймиз, қирғичдан ўтказамиз ва гўштнинг устидан соламиз. Помидор паст асини ҳам соламиз. Сўнг ҳаммасини бирга 5 дақиқача димлаймиз. Бодрингни ҳам сомонча шаклида тўғраймиз ва товага соламиз, яна 5 дақиқа димлаб оламиз.

Гўштни димлаётган вақтда картошкани арчамиз ва узун сомонча шаклида тўғраб оламиз. Унчалик ҳам юпқа кесманг, эзилиб кетиши мумкин.

Алоҳида товага ёғ солиб, картошкани қовуриб оламиз. Қовуриш жараёнида картошкага бироз туз сепамиз. Картошкани гўштнинг устига солиб аралаштирамиз ва 5 дақиқа димлаб қўямиз. Устидан кўкатлар, таъбга қараб саримсоқ ва аччиқ қалампир соламиз.

Тайёр овқатга 5-7 дақиқа дам берамиз. Сўнг эса дастурхонга тортишингиз мумкин. Ёқимли иштаҳа!