Одамларнинг кўп иши тушадиган бир ташкилотда ёнғин рўй берди. У ердаги энг масъул ходим Ўт ўчириш хизматига телефон қилди. – Тез етиб келинглар, казо-казо идора ёняпти! – Бир дақиқа шошманг, сизни мутахассис билан улайман...

Энг масъулнинг қулоғига аввал шўх янгроқи мусиқа, кейин мамнуният ва назокат билан йўғрилган иборалар эшитилади: – Ҳурматли абонент, Ўт ўчириш хизматига хуш келибсиз! Бизнинг янги хизматларимиз ҳақида маълумот олмоқчи бўлсангиз, «бир»ни босинг!

Кейин: – Борди-ю ёнғинга қарши ускуна жиҳозлатмоқчи бўлсангиз, унда «икки»ни босинг!

Кейин: – Диққат-диққат: Ўт ўчириш хизмати сизга ўт ўчиришнинг мутлақо янги усулларини тақдим этади! Яна ҳам кўпроқ билишни хоҳлайсизми? Унда «уч»ни босинг!

Кейин: – Булар орасида ўзингиз кутган вариант чиқмадими? Илтимос, алоқада қолинг...

Салдан кейин:

– Объектингизнинг кадастр рақамини, мулк эгасининг паспорт маълумотларини тайёрланг... Илтимос, алоқада қолинг...

Салдан кейин: – Сизнинг қўнғироғингиз биз учун жуда муҳим, илтимос, алоқада қолинг...

Икир-чикир техник овозлардан кейин:

– Ёнғинни ўзингиз мустақил равишда ўчирмоқчимисиз? Унда «Малакали ўт ўчирувчи» хизматидан фойдаланинг. Хизматни фаоллаштириш учун «беш»ни босинг! ...

– Ассалому алайкум! Ўт ўчириш хизмати оператори Фалончиев эшитади! – Бизда ёнғин чиқди! Биномиз ёняпти! – Айтинг-чи, сизга ким деб мурожаат қилишим мумкин? – Эсингизни еганмисиз, нима бало?! Бу ерда бино ёняпти, ким деб мурожаат қилишингизнинг нима аҳамияти бор? Тезда ўт ўчириш гуруҳини юборинг! – Бинонинг кадастр рақами ва мулкдорнинг исми, фамилияси, отасининг исмини айтиб юборсангиз. – Қанақасиз ўзи?! Мен ҳеч қанақа кадастр-падастрни билмайман, бизнинг идорани биласиз-ку, ўт ўчириш гуруҳи юбориш учун шунинг ўзи етарли эмасми?! – Илтимос, алоқада қолинг. Сизни мурожаатчиларни қўллаб-қувватлаш бўйича мутахассисга улайман...

Шўх-шодон мусиқа янграйди.

Бироздан сўнг: – Ёнғин сигнализациясини ўрнатишга буюртма бермоқчи бўлсангиз, «Сигнализация монтажи» деб айтинг!

Бироздан сўнг: – «Кеча-кундузлик ўт ўчириш хизмати»дан фойданмоқчи бўлсангиз, «Фаоллаштириш» деб айтинг!

Яна бироздан сўнг: – Сиз ўзингизга тўғри келган вариантни танламадингиз. Қўнғироғингиз операторга уланади...

Яна бироздан сўнг: – Ассалому алайкум! Ўт ўчириш хизмати    навбатчиси Писмадончиев эшитади! – Биномиз ёниб кетяпти! Бирон нарса қилсангиз-чи! – Айтинг-чи, сизга ким деб мурожаат қилишим мумкин? – Падарингга лаънат! Ит эмгурлар! Бино ёняпти, деяпман, гапга тушунасанларми ўзи?! – Бизнинг мутахассисларимиз сизнинг муаммоингизни кўриб чиқади. Айтинг-чи, сиз билан қайси рақам орқали боғланса бўлади? – Минг лаънат ҳаммангга!..

Ана шундай! Кўзамиз кунда эмас, кунида синади. Баъзан эса кўзамизни ўзимиз синдирган кўзамизнинг синиғи синдиради.

ЖУЛҚУНБОЙнинг жияни