Масаллиқлар: хамирига: 700 грамм ун, 230-250 миллилитр илиқ сув, 1.5 чой қошиқ туз, 2 ош қошиқ ўсимлик ёғи. Асосига: 1 кило картошка, 2-3 дона пиёз, 1 чой қошиқ зира, таъбга қараб туз ва мурч, 20 миллилитр ўсимлик ёғи. Қайласига: 2 дона помидор, 2 дона пиёз, 1 дона қизил булғор қалампири, 1 ош қошиқ помидор пастаси.

Тайёрланиши: Хамирни таёрлагач, у тингунича асосини тайёрлаб оламиз. Картошкани юпқа сомонча шаклида, пиёзни майда тўртбурчак шаклда тўғранг. Ҳаммасини катта идишга солинг ва зираворлардан сепинг, ўсимлик ёғи қўшиб, яхшилаб аралаштиринг. Хамирни олиб ёямиз ва тўртбурчак шаклда кесиб чиқамиз. Кесилган хамирчаларга асосни солиб чиқамиз ва четини ёпиштирамиз. Мантиқосқонни олиб ёғ суртиб чиқамиз ва хонимларни терамиз. Хонимлар устини ҳам ёғлаб, яна бир қават устидан хонимларни қўйиб чиқсангиз ҳам бўлади. Мантиқосқонни газга қўямиз ва ярим соат давомида пишириб оламиз.

Қайласини тайёрлаймиз: Пиёзни майда тўғраб ёғ солинган товада қовуриб оламиз. Блендерда помидор, булғор қалампири ва саримсоқни майдалаймиз. Пиёз устидан аввал помидор пастаси, 2 дақиқадан сўнг эса помидорли аралашмани солиб, 10 дақиқа давомида қайнатамиз. Туз сепамиз, таъбга қараб сув қўшсангиз ҳам бўлади. Пишган хонимларни ёғланган тоғорачага териб чиқамиз: ҳар бир қават хонимнинг устидан помидорли қайла қуйиб чиқамиз. Тайёр хонимлар устини ёпиб, 30 дақиқага четга олиб қўямиз. Бу вақт мобайнида хоним қайлани ўзига шимиб олади ва янада мазалироқ таъмга киради.

Сўнг хонимларни ликопчага соламиз ва тўғралган пиёз ва шивит билан бирга дастурхонга тортамиз.

zira.uz