Тўйимли ва мазали нарса хоҳлаяпсизми? Унда, туркча пицца тайёрланг. Бундай пицца юмшоқ ва жуда мазали бўлиб чиқади. Қолаверса бундай пишириқ, ишга ёки ўқишга олиб кетиш учун ажойиб егулик ҳамдир.

Керакли масаллиқлар: Хамир учун — 1 дона тухум, 8 грамм хамиртуруш, 1 ош қошиқ кефир, 100 миллилитр илиқ сув, 40 миллилитр ўсимлик ёғи, 270 грамм ун, 1 ош қошиқ асал, 50 миллилитр сув, 20 грамм оқ кунжут, 1 чой қошиқ шакар, бир чимдим туз. Хамирни қоплаш учун — 60 грамм пишлоқ, 60 грамм қайнатилган колбаса, 60 грамм помидор, 60 грамм қизил булғор қалампири.

Тайёрланиши: Қоплама тайёрлаш: Пишлоқ, колбаса, помидор ва булғор қалампирини тўртбурчак шаклида тўғралади. Хамирни тайёрлаш: Илиқ сувга кефир солиб, аралаштирамиз. Сўнгра хамиртуруш, шакар, туз, тухум, ўсимлик ёғи ва эланган ун солиб, юмшоқ, озроқ ёпишқоқ хамир қорамиз. Хамирни ёғланган идишга солиб, устини ёпишқоқ плёнка билан ёпамиз ва иссиқ жойда 40 дақиқа сақлаймиз.

Ошган хамирни 6 та бир хил бўлакларга бўламиз (80 граммдан). Думалоқлаб, устини ёпишқоқ плёнка билан ёпиб, 10 дақиқа тиндирамиз.

Идишда асал ва сувни аралаштирамиз. Бошқа ликопчага кунжут соламиз. Сўнгра ҳар бир думалоқни асалли сувга ботириб, кунжутга буркаймиз ва пергамент қоғози билан қопланган газ печи патнисига терамиз. Устини ёпишқоқ плёнка билан ёпиб, 10 дақиқага қолдирамиз.

Сўнгра булочкаларнинг ўртасида чуқурча ҳосил қилиб, масаллиқ соламиз. 180 даражада қиздирилган газ печига 20 дақиқа пиширамиз.

Ёқимли иштаҳа!

Ситора ОМОНОВА