Тайёрлаш усули: от ёки мол гўшти (баъзан, қази) қозондаги совуқ сувга солиниб, кейин милдиратиб (янги мол ёки от гўшти 1-1,5 соат, сур от гўшти 2 соат) қайнатилади. Сўнгра совитилиб сомонча шаклида майда тўғралади.
 

Ошхамир юпқа – 0,8-1 мм. қилинликда ёйилиб 10×10 см., 10×5 см. ли шапалоқлар кесилади. Хамир юқоридаги гўшт шўрвасида қайнатиб пишириб олинади ва бироз совитилгач, ҳар бир шапалоқ бетига доғланган пахта ёғи (ёки қази ёғи) суртилиб, лаганларга устма-уст тахланади. Сўнг шапалоқ хамир пилта қилиб (3,5-4 см.) кесилиб, сомонча шаклда майда қилиб тўғралади.
Тўғралган гўшт хамир билан аралаштирилади. Бундай норин қуруқ норин деб аталиб, тақсимчаларга солиб, юзига зира-пиёз ва 1-2 паррак қази қўйиб, яхна таом сифатида дастурхонга тортилади. Норин хамир пиширишдан аввал олиб қўйилган гўшт шўрваси ҳамда пиёз қўшиб ҳам истеъмол қилинади (ҳўл норин). Бундай норин косаларда дастурхонга тортилади.
Норин энг қадимий миллий таомларимиздан ҳисобланади. У юртимизнинг кўп ҳудудларида севиб исътемол қилинади.