Помидор ва бринзали галеталар – нонушта ёки тушлик ўрнини боса оладиган оддий, ёзги, жуда иштаҳаочар таомдир.
 

Масаллиқлар: хамир учун – 210-220 гр. ун, 110 гр. сариёғ, 1 та тухум сариғи, 80 миллилитр совуқ сут, бир чимдим туз. Асоси учун – 400 гр. помидор, 100 гр. бринза, ярим чойқошиқ қуритилган райҳон, 2 чойқошиқ помидорли кетчуп, устига суртиш учун тухум сариғи.
Тайёрланиши: Идишга унни элаб, сариёғни қирғичдан чиқарамиз. Бир чимдим туз солиб, қўлда увоқ шаклига келгунича ишқалаймиз. Тухум сариғини сут билан аралаштирамиз. Унли массада чуқурча ҳосил қилиб, у ерга суюқликни қуямиз. Хамир қориб, уни думалоқ шаклга келтирамиз. Сўнг­ра хамирни ёпишқоқ плёнкага ўраб, музлатгичга 30 дақиқага қўямиз.
Помидорни ингичка думалоқ шаклида кесамиз. Бринзани қўлда майдалаб, увоқ шаклига келтирамиз. Хамирни иккига бўламиз. Ҳар бир бўлакни қалинлиги 4-5 мм. келадиган думалоқ шаклида ёйиб оламиз ва газ печи патнисига жойлаштирамиз. Хамирга қайла ёки кетчуп суртамиз. Помидорни доира бўйлаб, устма-уст териб чиқамиз. Қуритилган райҳон сепамиз. Агар бринза етарлича шўр бўлса, унда туз сепишнинг ҳожати йўқ. Бринза увоғини помидор устидан сепиб чиқамиз. Хамир устига тухум сариғини сурамиз. 180 даражада қиздирилган газ печига 30 дақиқага қўямиз.
Ёқимли иштаҳа!